Ҳайдовчининг эҳтиёткорлиги туфайли сирпаниб кетган BMW Х6 билан тўқнашувнинг олди олинди (видео)

^{Фото: CARakoom}
Қиш мавсумида музли йўлларда машина бошқариш жуда мушкул. Россияда тасвирга олинган ушбу видеода ҳам вазият қанчалар қалтис эканлигини кўриш мумкин.

Содир бўлаётган воқеа қорли қияликдан кўтарилаётган ҳайдовчи томонидан тасвирга олинган. Тўсатдан қарама-қарши йўналишда пайдо бўлган қора BMW Х6 ҳайдовчиси бошқарувни бутунлай йўқотиб қўйгани тез орада аён бўлган. Автомобиль эса ён томони билан йўл бўйлаб сирғалиб ҳаракатланган.

Тўқнашувнинг олдини олиш мақсадида видео муаллифи тезлик билан тескари ҳаракатга ўтган ва орқага қайтишни бошлаган. Унинг вазиятга нисбатан тутган иши иккала автомобилнинг тўқнашишидан сақлаб қолган. Эҳтимол, BMW Х6 бошқарувидаги ҳайдовчи видео муаллифидан миннатдор бўлгандир.

Муз ёки қор билан қопланган йўлларда ҳаракатланаётганда, машина ғилдираклари қай даражада мавсумга мос бўлмасин шошилмасдан, секин ҳаракатланишни унутмаслик лозим.
«Замин»ни Telegram’да ўқинг!