17:37 / 08.07.2021
2 100

Германияда таниқли сиёсатшунос Хитойга жосуслик қилишда айбланмоқда


Германия федерал прокуратураси Трансмиллий тадқиқотлар институти (ITS) асосчиси ва раҳбарига Хитойга жосуслик қилиш бўйича айбловлар билдирди. Прокуратура ҳужжатларида айбланувчи исми-шарифи Клаус Л. деб кўрсатилган. Немис ОАВ фикрича, гап 75 ёшли Клаус Ланге ҳақида бормоқда.


Тергов маълумотларига кўра, айбланувчи 2010 йилда Шанҳайдаги Тунцзи университетида маърузалар ўқиган вақтида Хитой разведкаси томонидан ёлланган. У 2019 йил ноябргача муайян ҳақ эвазига хитойлик кураторларига ахборот бериб келган. У ахборотни институтдаги фаолияти давомида сиёсий доираларда орттирган кўплаб танишлари орасида тўплаган.

Унинг кураторлари билан учрашиш учун Хитойга ва бошқа давлатларга сафарларини қабул қилувчи томон тўлаб берган. Клаус Л. 2019 йил ноябрдаги шундай сафарларидан бири олдидан немис полицияси томонидан қўлга олинган. Унинг уйида ўтказилган тинтув вақтида компьютерлар ва қаттиқ дисклар олинган.

Бу орада ARD немис телеканали Клаус Л. қўш агент бўлгани ва 50 йил аввал Германия федерал разведка хизмати (BND) учун ишлашни бошлаганини аниқлаган. У BND’ни пул эвазига ахборот билан таъминлаб турган.

Клаус Л. 1980-йиллар бошида сиёсий тадқиқотлар жамғармасида ишлаган ва ўз иши давомида тез-тез хорижга маърузалар ўқигани чиқиб турган. У жумладан, собиқ иттифоқ ва кейинчалик Россияда, Жануби-Шарқий Осиё, Болқон давлатлари, ЖАРда бўлган. У жамғармадаги фаолиятидан кейин ўз институтини ташкил этган.

ARD’нинг хабар беришича, Клаус Л. 2010 йилда немис разведкасини Хитой махсус хизматлари унга қизиқиш билдираётганидан хабардор қилган. Германия махсус хизмати эса хитойликлар нима истаётганини билиш учун унга алоқани давом эттиришга кўрсатма берган. Бироқ айбланувчи Хитой разведкаси билан кейинги алоқалари ҳақида BND’ни воқиф қилмаган ва хитойликлар билан яқиндан ишлашни бошлаган. Таъкидланишича, ҳозирча Хитой Клаус Л. BND билан алоқага эга бўлганидан хабардорлиги ёки йўқлиги аниқланмаган.

arenda kvartira tashkent


Ctrl
Enter
Хато топдИнгизми?
Иборани ажратиб Ctrl+Enter тугмасини босинг
Янгиликлар » Дунё » Германияда таниқли сиёсатшунос Хитойга жосуслик қилишда айбланмоқда