АҚШ президенти: Биз афғонларга ўз келажагини қуриши учун ҳамма нарсани бердик

^{Фото: AP Photo}
АҚШ президенти Жо Байден Америка қўшинларини Афғонистондан олиб чиқиш тўғрисидаги қароридан афсусланмаслигини айтди. Байденнинг Афғонистондаги вазиятга бағишланган нутқи ҳақида Meduza қисқача баён қилди.

«Биз 20 йил олдин Афғонистонга 11 сентябрь воқеаларини уюштирганларга жавоб қайтариш ҳамда «Ал-Қоида» ҳужумлар учун Афғонистондан таянч сифатида фойдаланмаслигини таъминлаш учун келгандик. Буни уддаладик. Биз ҳеч қачон афғонларга ўз давлатини қуришда ёрдам беришни мақсад қилмаганмиз. Агар афғон кучларининг ўзида жанг қилиш истаги бўлмаса, америкаликлар бировнинг урушида жанг қилмаслиги ва ҳалок бўлмаслиги керак.

Биз триллион доллар сарфладик ва уларга ўз келажагини белгилаш учун зарур бўлган ҳамма нарсани бердик, лекин биз уларга бу келажак учун курашиш истагини бера олмаймиз. Агар Афғонистоннинг ўзи «Толибон»га қарши тура олмаса, у ҳолда АҚШнинг на бир йил, на беш йил, на йигирма йил қўшимча бўлиши уларга ёрдам бермаган бўларди. Америка қўшинларини доимий жойлаштириш билан чет давлатини қайта тиклашга уриниш хато бўларди.

Бу зиддиятда қатнашиш АҚШ манфаатларига тўғри келмайди. Агар биз Афғонистонга миллиардлаб доллар сарфлашни давом эттирсак, бундан рақибларимиз — Россия ва Хитой хурсанд бўларди. Менга Афғонистонда юз бераётган воқеалар ёқмаяпти, лекин мен ўз қароримга ишонаман. Бизнинг вазифамиз — эвакуация қилиш, шундан кейин уруш биз учун тугайди», — Байден ўз нутқида.

Байден, яқин кунларда бир неча минг Америка фуқаролари Афғонистондан олиб чиқилишини айтди. Бундан ташқари, АҚШ элчихона, нодавлат нотижорат ташкилотлари ва АҚШ ахборот агентликларида ишлаган афғонларнинг ҳимоясиз гуруҳлари учун қочқинларни қабул қилиш имкониятини кенгайтиради.

Эслатиб ўтамиз, 15 август куни «Толибон» Афғонистоннинг бутун ҳудудини ўз назорати остига олганини эълон қилди. Шу куни «Толибон» Кобулдаги президент саройига кирди. Кейинроқ ҳукумат кучлари тарк этган барча давлат муассасаларини ва давлат телевидениесини эгаллаб олди.

Афғонистон президенти Ашраф Ғани «Толибон» Кобулни эгаллаганидан кейин истеъфога чиққанини эълон қилиб, мамлакатдан хорижга чиқиб кетди. 16 августда афғон махсус қўшинлари тарқатиб юборилди. “Замин” янгиликларини “Facebook”да кузатиб боринг