«Толибон»га қарши кучлар етакчиси Аҳмад Масъуд қандай шарт билан жангни тўхтатишини айтди

^{Аҳмад Масъудга содиқ халқ лашкари
Фото: AP Photo}
«Толибон» назорати остига ўтмаган Панжшер вилоятидаги қаршилик кучлари етакчиси Аҳмад Масъуд агар «Толибон» барча афғонларга тенг ҳуқуқлилик тақдим этиб, инклюзив ҳукумат тузса, қаршилик кўрсатишни тўхтатишга тайёрлигини билдирди. Бу ҳақда у Foreign Policy нашрига берган интервьюсида айтиб ўтди.

«Агар ‘Толибон’ ҳокимиятни ҳамма билан бўлишишга, адолат ўрнатишга ҳамда бутун Афғонистонга тенг ҳуқуқ ва эркинликлар тақдим этишга тайёр бўлса, у ҳолда мен чекинаман ва сиёсатдан кетаман», — деди қаршилик кучлари етакчиси.

Масъуднинг қайд этишича, қаршилик кучлари ҳокимият бўлинмайдиган бўлса, курашдан воз кечмоқчи эмас. «Биз 50 йилдан буён тинчлик учун курашдик, бизни эса доим уришишга мажбур қилиб келишди. Аммо тинчлик дегани таслим бўлиш ҳамда Афғонистонда адолатсизлик ва тенгсизликни сақлаб қолиш дегани эмас», — дея хулоса қилди у.

Унинг сўзларига кўра, Афғонистондаги зиддиятни фуқаролар уруши деб атаб бўлмайди, чунки «Толибон» мамлакатнинг ички ишларига аралашадиган ташқи кучлар томонидан қўллаб-қувватланмоқда. Шу билан бирга, унинг ўзи бошқа мамлакатлардан ҳеч қандай ёрдам олмаётганини таъкидлади.

15 август куни «Толибон» Кобулга кириб, бутун мамлакат устидан назорат ўрнатганини эълон қилди. Масъуд Панжшер вилоятини «Толибон»га топширишдан бош тортди. Вилоятда, шунингдек, вице-президент Амрулла Солиҳ ҳам бўлиб, у президент мамлакатдан қочиб кетганидан кейин ўзини унинг вазифасини бажарувчи деб эълон қилди.

30 август куни АҚШ Афғонистондан ўз қўшинларини олиб кетиш жараёнини якунлади, шундан кейин «Толибон» Афғонистоннинг тўлиқ мустақиллигини эълон қилди. “Замин” янгиликларини “Одноклассники”да кузатиб боринг