Байден рейтинги 1945 йилдан кейинги АҚШ президентлари орасида антирекорд қайд этди

^{Фото: Getty Images}
АҚШнинг амалдаги президенти Жо Байден рейтинги давлат раҳбари лавозимини эгаллаганидан 9 ой ўтиб 11,3 фоизга, яъни 56 фоиздан 44,7 фоизгача пасайиб кетди. Бу эса Иккинчи жаҳон урушидан кейин АҚШга раҳбарлик қилган президентлар орасида рейтингнинг энг кучли пасайиши ҳисобланади.

Байденгача 9 ой ичида рейтингнинг энг кучли пасайиши Барак Обамада қайд қилинган ва 10,1 фоизни ташкил этган. Жимми Картерда ушбу кўрсаткич 8,9 фоизни, Дональд Трампда 4,4 фоизни ташкил қилган. Катта ва Кичик Жорж Бушларнинг рейтинги эса бу давр давомида аксинча ўсган ва мос равишда 12 ҳамда 13,1 фоизни ташкил қилган.

Сўровномани ўтказган жамоатчилик фикрини ўрганиш институти Gallup’нинг таъкидлашича, Байден рейтингининг пасайиши АҚШда коронавирус билан касалланиш даражаси юқорилиги, америкалик ҳарбийларнинг Афғонистондан олиб чиқилиши ва иқтисодиётдаги муаммолар билан тушунтирилади.

АҚШда ўтказилган охирги сўровномаларга кўра, АҚШнинг амалдаги президентини қўллаб-қувватлаш рейтинги ўртача 42,9 фоизни ташкил қилмоқда. Жумладан, Байденнинг фаолиятини ўзини бирорта партияга киритмайдиган америкаликларнинг аксарияти қўллаб-қувватламайди.

Янгиликлар