Арабика қаҳвасининг нархи рекорд даражада ошди

^{Фото: Meatcore}
Нью-Йоркнинг ICЕ Futures биржасидаги савдо маълумотларига кўра, арабика навли қаҳванинг нархи 10 йиллик рекордни янгилади.

Ноябрь ойининг ўрталаридан бошлаб шартномаларда бир фунт (0,45 килограмм) маҳсулот нархи 2,2 доллардан ошиб кетди. Сўнгги марта қаҳва нархида бундай юқори кўрсаткич 2012 йилнинг январь ойида қайд этилган. 16 ноябрь, сешанба, кунги савдолар давомида декабрь шартномалари бир фунт қаҳва учун 2,24 долларгача кўтарилди.

Нархнинг ошишига йирик ишлаб чиқарувчиларнинг етказиб беришидаги узилишлар сабаб бўлди, деб ёзади Trading Economics. Бразилия совуқ ва қурғоқчиликни бошдан кечирди, Колумбиядаги экинлар кучли ёмғирдан азият чекди, Вьетнам экспорти эса юк ташиш контейнерларининг етишмаслиги туфайли камайди. АҚШ Қишлоқ хўжалиги вазирлиги ўзининг сўнгги ҳисоботида глобал қаҳва захиралари 2020 йилга нисбатан 77 фоизга камайганини айтган. Унга кўра, қаҳва нархи транспорт харажатларининг юқорилиги, ўғитлар нархининг ошиши ва ишчи кучи етишмаслиги туфайли ўсишда давом этади.

Ноябрь ойи бошида Бирлашган Миллатлар Ташкилоти озиқ-овқат маҳсулотларининг жаҳон миқёсидаги нархлари сўнгги ўн йилдаги энг юқори даражага кўтарилгани ҳақида хабар берганди. Ташкилот ҳисоб-китобларига кўра, октябрь ойи якунида энг оммабоп озиқ-овқат маҳсулотларини ўз ичига олган озиқ-овқат нархлари индексининг қиймати 133,2 пунктга етган. Индекс охирги марта 2011 йилда 130 пунктдан ошиб кетган эди. «Замин»ни Telegram’да ўқинг!