Украинага босқиннинг биринчи кунида россиялик энг бой тадбиркорлар 39 миллиард доллар йўқотишди

^{Вагит Алекперов}
Россиянинг Украинадаги ҳарбий операцияси биринчи кунида россиялик энг бадавлат бизнес вакилларининг бойлиги 39 миллиард долларга камайди, деб хабар бермоқда Bloomberg.

«Қашшоқлашган» миллиардерлар рўйхатини LUKOIL президенти Вагит Алекперов бошқариб турибди. Унинг бойлиги бир сутка ичида қарийб 6,2 миллиард долларга камайиб, 13 миллиард долларни ташкил этган.

Bloomberg индексида энг бой россиялик сифатида қайд этилган Norilsk Nikel президенти Владимир Потанин қарийб 3 миллиард доллар йўқотган. (Унинг бойлиги 26,1 миллиард долларгача камайган). Severstal директорлар кенгаши раҳбари Алексей Мордашовнинг зарари эса 4,2 миллиард долларни ташкил қилган ва умумий бойлиги 23 миллиард долларгача камайгани қайд этилган.

Асли ўзбекистонлик бўлган Алишер Усмонов 1,2 млрд доллар, Искандар Маҳмудов эса 900 млн доллар йўқотган.

Шунингдек, 2022 йил бошидан бери Алекперов ва Тимченконинг ҳар бири 10 миллиард доллар ёки умумий бойликларининг 40 фоиздан ортиғини йўқотган. Бу барча россиялик миллиардерлар орасида энг катта йўқотиш ҳисобланади, дея таъкидламоқда Bloomberg.

Агентлик маълумотларига кўра, россиялик миллиардерларнинг умумий бойлиги 2021 йил охирида 375 миллиард долларга баҳоланган. “Замин” янгиликларини “Facebook”да кузатиб боринг