АҚШ Хитойни Россияга ёрдам бермаслик ҳақида огоҳлантирди

^{Фото: «РИА Новости»}
АҚШ миллий хавфсизлик маслаҳатчиси Жейк Салливан 14 март, душанба куни Римда хитойлик дипломат Ян Сзечи билан етти соатлик учрашувда Хитойнинг Россия билан ҳамфикрлигидан хавотир билдирди. Вашингтон ҳам Пекин Москванинг Украинадаги босқинига ёрдам берса, яккаланиб қолиши ва жазоланиши ҳақида огоҳлантирди.

Музокаралар якунлангач, Оқ уй қисқа баёнот чиқариб, Салливан «АҚШ-Хитой муносабатларидаги қатор масалаларни кўтаргани ҳамда Россиянинг Украинага қарши урушини жиддий муҳокама қилганини» таъкидлади.

«Агар улар (Хитой) ҳарбий ёки бошқа турдаги ёрдам кўрсаца, санкцияларни бузса ёки уруш ҳаракатларини қўллаб-қувватласа, бу шубҳасиз, жиддий оқибатларга олиб келади», — деди Оқ уй матбуот котиби Жен Псаки.

АҚШнинг Россия экспорти бўйича чекловларига қарши чиққан Хитой компаниялари ўз маҳсулотларини ишлаб чиқариш учун зарур бўлган Америка ускуналари ва дастурий таъминотидан маҳрум қилиниши мумкин, деган эди ўтган ҳафта АҚШ Савдо вазири Жина Раймондо.

Аввалроқ Financial Times, The New York Times ва The Washington Post нашрлари АҚШ ҳукуматидаги исми ошкор этилмаган манбаларга таяниб, Россия ҳукумати Хитойдан Украинадаги босқинини қўллаб-қувватлаш учун ҳарбий техника ва иқтисодий ёрдам сўрагани ҳақида ёзганди.

Россия Хитойдан ҳарбий ёрдам сўраганини инкор этди ва Украинадаги мақсадларини амалга ошириш учун етарли даражада ҳарбий кучга эга эканини иддао қилди.

Хитой дунёдаги энг йирик экспортчи, Европа Иттифоқининг савдодаги энг йирик шериги ва АҚШга асосий хорижий товарлар етказиб берувчи ҳисобланади. Хитой савдосига ҳар қандай босим АҚШ ва унинг иттифоқчиларига иқтисодий таъсир кўрсатиши мумкин.

АҚШ, Хитой, Россия, АҚШ-Хитой муносабатлари “Замин” янгиликларини “Telegram”да кузатиб боринг