Зеленскийнинг ўзбекистонлик қиёфадошини Путиннинг қиёфадоши Киевдан қутқариб олиб чиқди

^{Умид Исабоев Польша чегарасида. Foto: Howard X’нинг Facebook саҳифасидан}
Украина президенти Владимир Зеленскийнинг ўзбекистонлик қиёфадоши, ўтмишда автобўёқчи, ҳозир актёрлик билан шуғулланаётган Умид Исабоев Украинага ҳужум бошланганида Киев шаҳрида бўлган.

Уруш бошланганидан буён Владимир Зеленский Владимир Путин билан юзма-юз учрашишни талаб қилиб келади. Сиёсатчилар ўзаро мулоқот қилишга эриша олишмаган эса-да, лекин уларнинг қиёфадошлари аллақачон учрашишди, деб ёзади TJournal.

«Россия президенти» Киевда бўлиб турган «Украина президенти»га Польшадан бошпана топишга ёрдам берган, уни Украинадан олиб чиқишни эса «Шимолий Корея етакчиси Ким Чен Ун» ташкиллаштирган.

Ўзбекистонлик Умид Исабоев — касби бўйича автобўёқчи (Kun.uz у билан интервью ҳам уюштирган эди — таҳр). 2019 йилда унинг Москва метросида туширилган фотосурати Украина президенти Зеленскийга жуда ўхшашлиги учун ижтимоий тармоқларда тарқалган.

Кутилмаган машҳурликдан сўнг Умид Россия продюсерлик компанияси билан ишлай бошлаган, бир неча бор телешоуларда қатнашган, ҳаттоки Зеленскийни машҳур қилган «Халқ хизматкори» сериалининг янгича талқинида рол ўйнаш таклифини олган.

^{Умид Исабоевни машҳур қилган фотосурат}
2021 йилда Исабоевнинг шартномаси якунлангач, Украина ҳукумати уни Киевга таклиф қилиб, уй-жой билан таъминлаб, иш топишда ёрдам беришган. Февраль ойи охирида Россия Украинага ҳужум бошлагач, у Киевда бўлиб турган эди. Ўзининг айтишича, унга аввалги иш берувчилари алоқага чиқиб, уни Москвага қайтариб олиб чиқишларини, янги шартнома имзолашни таклиф қилишган. Лекин Умид Исабоев рад жавобини берган.

Унга ёрдамга Ҳовард Икс келган. У КХДР етакчиси Ким Чен Иннинг энг машҳур қиёфадошларидан биридир. (Масалан, у Little Big’нинг «LollyBomb» клипида суратга тушган).

У март ойининг бошида ҳамкасби тушиб қолган вазиятдан хабар топган ва «қутқариш операцияси»ни бошлаган. Бунинг учун у яна бир президент қиёфадоши — польшалик Стив Поланд билан боғланган. Стив 2013 йилдан буён омма олдида Владимир Путин қиёфасида намоён бўлади: унинг ишлари ичида Duran Duran гуруҳининг «Anniversary» клипида съёмка ҳам бор.

^{Howard X ва Стив Поланд Россияда ўтган ЖЧ-2018 да}
Поланд украиналик волонтёрлар билан алоқага чиққан ва Умид Исабоевга ёрдам беришни сўраган. 8 март куни Зеленскийнинг қиёфадошини пойтахт Киевдан 100 км наридаги бошқа шаҳарга олиб чиқишган, орадан уч кун ўтгач Польша чегарасига етказишган. Бир неча соат ичида Исабоев бошқа қочқинлар билан бирга чегара пунктини кесиб ўтган. Унинг ҳикоя қилишича, «президент»ни ўтказаётиб чегарачилар кулиб юборишган.

^{Стив Поланд ва Умид Исабоев.
Фото: Howard X’нинг Facebook саҳифасидан}
«Мен унга меҳмонхонага жойлашишга ёрдам бердим. У ҳордиқ чиқаргач, биз жуда илиқ суҳбатлашдик. Умид менга кўрсатилган ёрдам учун миннатдорчилик билдирди. Биз уч соатча суҳбатлашдик: у ўз иши ҳақида гапириб берди», — деган Стив Поланд.

^{Умид Исабоев украиналик волнтёрлар орасида.
Фото: Howard X’нинг Facebook саҳифасидан}
Умид Исабоев Поландга Польшада ушланиб қолиши, ўз қиёфаси билан боғлиқ иш топишни режалаштираётганини айтган. Ҳовард Икс дастлабки ойларда озиқ-овқат ва турар жой масаласида ёрдам қилишга ваъда берган. Актёрларнинг сўзларига кўра, улар сатира ва юмор воситасида «авторитар давлатлар режимига қарши туриш»да давом этишади. “Замин” янгиликларини “Youtube”да кузатиб боринг