Кремль Россия Владимир Зеленскийни ўлдирмоқчилиги ҳақида: «Ундай эмас»

^{Фото: Reuters}
Владимир Путиннинг матбуот котиби Дмитрий Песков Россия ҳукумати Украина президенти Владимир Зеленскийни ўлдирмоқчилиги ҳақидаги хабарларни рад этди. Бу ҳақда у Франциянинг LCI телеканалига берган интервьюсида маълум қилган.

«Йўқ, ундай эмас», — дейди Песков бу борадаги саволга жавобан. «РИА Новости»нинг ёзишича, Кремль вакили инглиз тилида гапирган, унинг сўзлари французчага таржима билан трансляция қилинган.

Украина президентининг офиси вакилларига кўра, сўнгги ҳафталарда Владимир Зеленскийга ўндан ортиқ суиқасд уюштирилган. «Бизнинг қўриқлов хизматимиз бу масалалар билан ва бу ерга ов учун келадиган муаммоли унсурларни бартараф этиш билан шуғулланмоқда», — деган эди Зеленский ўзига уюштирилган суиқасдлар тўғрисида.

Февраль охирларида Кремль топшириғига кўра «Вагнер» хусусий ҳарбий компаниясининг 400 дан ортиқ ёлланма жангарилари Киевда жанг қилаётгани тўғрисида хабар берилганди. The Times март бошларида бир ҳафта ичида Украина президенти Владимир Зеленскийнинг ҳаётига камида уч марта суиқасд уюштирилганини ёзган.

Янгиликлар