Электротехника экспортини 1 млрд долларга етказиш вазифаси қўйилды
Президент Шавкат Мирзиёев раислигида ўтган йиғилишда биринчи чоракдаги иқтисодий камчиликлар таҳлил қилиниб, саноат ва экспорт режаларини бажармаган 13 та туман ҳокимига интизомий чора кўрилди. Электротехника соҳасидаги паст кўрсаткичлар танқид қилиниб, йил якунига қадар ишлаб чиқаришни 25 триллион сўмга, экспортни эса 1 миллиард долларга етказиш бўйича қатъий вазифалар белгиланди. Давлат раҳбари драйвер тармоқларда меҳнат унумдорлигини ошириш учун 30 миллион доллар грант ажратиш ва янги бозорларни ўзлаштириш зарурлигини таъкидлади. Экспорт кўрсаткичлари паст бўлган ҳудуд раҳбарлари огоҳлантирилиб, ярим йиллик якуни бўйича ижобий ўзгариш бўлмаса, уларга нисбатан қатъий чоралар кўрилиши белгиланди.
Президент Шавкат Мирзиёев раислигида ўтган йиғилишда биринчи чоракдаги иқтисодий ўсиш таҳлил қилиниб, саноат ва экспорт соҳасидаги камчиликлар кўриб чиқилди. Хусусан, саноат кўрсаткичлари бўйича прогнозни бажармаган Тошкент шаҳрининг Сергели ва Шайхонтоҳур, шунингдек, Жиззах, Қашқадарё ва бошқа вилоятлардаги жами 13 та туман ҳокимларига нисбатан интизомий чоралар кўриш топширилди. Бу ҳақда Spot.uz хабар беради.
Электротехника соҳасида мисни қайта ишлаш ҳажми пастлиги сабабли ишлаб чиқариш ўсиши кутилган 11,2 фоиз ўрнига 7,8 фоизни ташкил этди, экспорт режаси эса атиги 57 фоизга бажарилди.
Давлат раҳбари масъулларга корхоналардаги муаммоларни жойида ҳал этиш ва иккинчи чорак якунига қадар электротехника ишлаб чиқаришни 25 трлн сўмга, экспортни эса 1 млрд долларга етказиш вазифасини қўйди.
Йиғилишда меҳнат унумдорлигини ошириш масаласига ҳам алоҳида эътибор қаратилди. Мирзиёев тўқимачилик, мебелсозлик ва қурилиш материаллари каби драйвер тармоқлар уюшмаларини хорижий тажрибаларни оммалаштирмаётгани учун танқид қилди.
Иқтисодиёт ва молия вазирлигига 100 та корхонада самарадорликни ошириш дастурини жорий этиш учун 30 млн доллар грант жалб қилиш топшириғи берилди.
Экспорт кўрсаткичлари 70 фоиздан паст бўлган Жиззах, Навоий, Наманган каби шаҳарлар ва қатор туманлар раҳбарлари огоҳлантирилди. Агар ярим йиллик якунлари бўйича ижобий ўзгаришлар бўлмаса, ушбу туман ҳокимларига нисбатан қатъий чоралар кўрилиши маълум қилинди.
Шунингдек, янги бозорларни топиш ва логистика масалаларини ҳал этиш учун яхлит тизим яратиш зарурлиги таъкидланди.
Изоҳлар 0
…