Дунёнинг энг йирик стейблкоин эмитенти Tether компанияси Грузия ҳукумати билан ҳамкорликда миллий валюта — лари курсига боғланган янги “ГEЛТ” рақамли активини ишга туширишни режалаштирмоқда. Ушбу лойиҳа мамлакатнинг рақамли активлар бўйича янги қонунчилик базаси доирасида амалга оширилади. Tether вакилларининг сўзларига кўра, ГEЛТ стейбклоини Грузияда трансчегаравий савдо ва рақамли тўловларни ривожлантиришга хизмат қилади. Бу ҳақда Cointelegraph.com хабар беради.
Грузия ҳукумати сўнгги вақтларда рақамли активлар ва стейблкоинлар учун қатъий қоидаларни ишлаб чиқиш устида фаол иш олиб бормоқда. Мазкур тартибга солиш тизими резервларни бошқариш, активларни қайтариб олиш ҳуқуқи, эмитентлар устидан назорат ва жиноий даромадларни легаллаштиришга қарши кураш (АМЛ) талабларини ўз ичига олади. Грузия Миллий банки март ойида “барқарор виртуал активлар” учун тўлиқ резерв таъминоти ва ташқи аудиторлик текшируви каби талабларни эълон қилган эди.
Грузия Бош вазири Иракли Кобахидзе Tether билан ҳамкорлик янада шаффоф ва ўзаро боғланган молиявий дунё пойдеворини яратишга ёрдам беришини таъкидлади. Миллий банк президенти Натиа Турнава эса ушбу ҳамкорликни мамлакатнинг рақамли молиявий инфратузилмани ривожлантириш стратегиясининг муҳим қисми сифатида олқишлади. Ҳозирча ГEЛТ лойиҳасининг аниқ ишга тушиш муддати ва резервлар қаерда сақланиши ҳақида батафсил маълумот берилмаган.
Янги қоидаларга кўра, Грузияда стейблкоинларни чиқариш учун Миллий банкнинг ёзма розилиги талаб этилади. Шунингдек, барча муомаладаги стейблкоинлар ликвидлик ва кредит сифати талабларига жавоб берадиган резерв активлари билан 100 фоиз таъминланган бўлиши шарт. Бу чора-тадбирлар истеъмолчилар ҳуқуқларини ҳимоя қилиш ва халқаро стандартларга мувофиқликни таъминлашга қаратилган.
ГEЛТ лойиҳаси Tether компаниясининг USDT'дан ташқари бошқа миллий валюталарга боғланган активлари қаторига қўшилади. Компания аввалроқ Мексика песоси (МХНТ) ва оффшор Хитой юани (КНҲТ) курсига боғланган токенларни чиқарган эди. Шунингдек, 2024-йилда Бирлашган Араб Амирликлари дирҳамига боғланган янги стейблкоин чиқарилиши ҳам режалаштирилган.
“Zamin”ни Telegram'да ўқинг!
