Блокчейн инфратузилмаси платформаси ва стейблкоинлар эмитенти бўлган Пахос компанияси АҚШ Қимматли қоғозлар ва биржалар комиссияси (SEК) томонидан клиринг агентлиги сифатида рўйхатдан ўтказилган биринчи “блокчейн-нейтив” фирма бўлганини эълон қилди. Компаниянинг шоъба корхонаси бўлган Пахос Секуритиес Сеттлемент Компани эндиликда АҚШда марказий қимматли қоғозлар депозитарийси сифатида клиринг ва ҳисоб-китоб хизматларини кўрсатиш ҳуқуқига эга ягона блокчейн компаниясига айланди. Бу ҳақда Cointelegraph.com хабар беради.
Ушбу қарор блокчейн технологияси ва анъанавий капитал бозорлари бирлашишда давом этаётган бир пайтда молиявий бозор инфратузилмасининг муҳим бўлаги ҳисобланади. Клиринг агентликлари қимматли қоғозлар савдоси тўғри бажарилишини таъминлайди. Акция сотиб олувчилар ва сотувчилар бевосита савдо қилмайдилар; улар битимни тасдиқлайдиган, томонларни мослаштирадиган ҳамда пул ва қимматли қоғозлар алмашинувини кафолатлайдиган провайдерларга эҳтиёж сезадилар.
SEК томонидан тасдиқланган блокчейн-клиринг маркази банклар ва брокерлик компаниялари учун крипто-инфратузилмани қуришдаги тўсиқларни олиб ташлайди. Пахос 2019-йилдан буён ушбу йўналишда SEК билан ҳамкорлик қилиб келмоқда. Компаниянинг тажриба лойиҳаси блокчейн асосидаги пост-трейд инфратузилмаси бир кунлик ҳисоб-китобларни амалга ошириш, харажатларни камайтириш ва операцион самарадорликни ошириш имконини беришини исботлади.
Пахос асосчиси ва бош директори Чарлес Каскарилла ушбу рўйхатдан ўтиш SEК билан етти йиллик меҳнат маҳсули эканини таъкидлади. Ҳозирда Пахос бир қатор рақамли активлар, жумладан PayPal УСД (ПЮСД), Глобал Доллар (УСДГ) ва Пах Голд (ПАХГ) эмитенти ҳисобланади. Аввалроқ компания Binance УСД (БУСД) стейбкоини туфайли регулятор билан зиддиятларга дуч келган эди, бироқ янги лицензия компания учун янги имкониятлар очмоқда.
“Zamin”ни Telegram'да ўқинг!
