Жанубий Кореянинг Коиноне крипто биржаси Кореа Инвестмент & Секуритиес (КИС) ва ОКХ Вентурес платформанинг 19,6 фоиз улушини сотиб олиш учун жами 160 миллиард вон (тахминан 106 миллион УСД) миқдорида инвестиция киритишга келишиб олганини маълум қилди. Ушбу битим тартибга солувчи органлар томонидан тасдиқланиши кутилмоқда. Бу ҳақда Cointelegraph.com хабар беради.
Мазкур инвестиция лойиҳаси доирасида КИС ва ОКХ Вентурес компаниялари Коиноне платформасининг бош директори Мюнг-Ҳун Ча ва Ком2уС Ҳолдингс компаниясидан кейинги учинчи йирик акциядорга айланади. Келишувга кўра, мавжуд акциядорлардан иккиламчи акцияларни сотиб олиш ҳамда янги акциялар чиқариш кўзда тутилган. Мюнг-Ҳун Ча компаниянинг энг йирик акциядори ва бошқарув назоратини ўзида сақлаб қолади.
Ушбу стратегик ҳамкорлик ОКХ Вентурес учун Осиёнинг энг қатъий тартибга солинадиган крипто бозорларидан бирига кириш имконини беради. ОКХ вакилларининг таъкидлашича, ушбу шериклик компаниянинг хавфсиз ва қонуний инфратузилмага бўлган эътиборини акс эттиради. КИС эса Жанубий Кореяда токенлаштирилган молия қоидалари ривожланиб бораётган бир пайтда, Коиноне билан хавфсизлик токенлари (СТО) ва стаблекоин лойиҳалари устида ишлашни режалаштирмоқда.
Жанубий Кореяда 2024-йилда "Виртуал активлар фойдаланувчиларини ҳимоя қилиш тўғрисида"ги қонун кучга кирганидан сўнг, крипто сектори устидан назорат сезиларли даражада кучайди. Упбит, Битумб, Коиноне ва Корбит каби биржалар эндиликда жиноий даромадларни легаллаштиришга қарши кураш бўйича қатъий талабларга риоя қилишлари шарт.
Шу билан бирга, Сеул ҳукумати анъанавий молия институтларининг рақамли активлар бозорига кириши учун эшикларни аста-секин очмоқда. Феврал ойида Мирае Ассет Консультинг компанияси Корбит биржасининг 92,06 фоиз улушини сотиб олишга келишган эди, бу эса мамлакатда анъанавий молия ва крипто сектори интеграциялашуви кучайиб бораётганидан далолат беради.
“Zamin”ни Telegram'да ўқинг!
