Тошкентда ўзганинг Nexia-2 автомобилини олиб қочган 20 ёшли йигит ушланди (фото)

Тошкент шаҳри Шайхонтоҳур туманида 15 сентябрь куни машина олиб қочган 20 ёшли йигит қўлга олинди. Бу ҳақда Тергов департаменти хабар бермоқда.

Қайд этилишича, шу куни соат 05:00 да номаълум шахс транспорт воситасини олиб қочиш мақсадида Шайхонтоҳур тумани «Гулобод» маҳалласида жойлашган 41-сонли мактаб биноси олдида бўла туриб, шу ерда қаровсиз қолдирилган, 37 ёшли У.Ч.га тегишли Nexia-2 эшигини ўз ёнида бўлган сих ёрдамида очиб, олиб қочгани аниқланган.

Олиб борилган тергов-тезкор тадбирлари давомида шу куннинг ўзида соат 11:30 да мазкур автомашина Олмазор тумани Фаробий кўчасида жойлашган савдо маркази олдида ЙПХ ходимлари томонидан тўхтатилиб, ҳайдовчининг шахси текширилган. У Тошкент вилоятида яшовчи муқаддам судланган 20 ёшли А.С. экани аниқланган ва қўлга олинган.

Мазкур ҳолат юзасидан Шайхонтоҳур тумани ИИО ФМБ ҳузуридаги тергов бўлими томонидан А.С.га нисбатан Жиноят кодекснинг 267-моддаси 1-қисми (транспорт воситасини олиб қочиш) билан қўзғатилиб, у процессуал тартибида ушланган. Тергов ҳаракатлари давом этмоқда.

Жиноят кодексининг нормаларига кўра, ушбу жиноятни содир этган шахс 5 йилдан 10 йилгача озодликдан маҳрум қилиш билан жазоланиши мумкин. “Замин” янгиликларини “Telegram”да кузатиб боринг