Тошкентдаги айрим кўчаларда тезлик соатига 50 километргача чекланди

10 октябрь куни халқ депутатлари Тошкент шаҳар кенгаши пойтахтнинг Кичик ҳалқа автомобиль йўли ичида жойлашган барча кўчаларда транспорт воситаларининг ҳаракат тезлигини соатига 60 км.гача чеклаш тўғрисида қарор қабул қилди.

Бундан ташқари, Тошкент шаҳридаги айрим кўчаларда, жумладан, Алишер Навоий, Маҳтумқули, Амир Темур, Кичик ҳалқа автомобиль йўли, Ислом Каримов, Тарас Шевченко, Бобур ва Фурқат кўчаларининг бир қисми ва Амир Темур хиёбони айланма йўлида траспорт воситаларининг ҳаракат тезлигини соатига 50 км.гача чекланади.

^{Фото: Тошкент шаҳар ҳокимлиги ахборот хизмати}
Davletov.uz телеграм-канали бордию ушбу чора ўз самарасини берса, келажакда шаҳардаги барча кўчаларда тезлик пасайтирилиши ҳақида ёзди.

Эслатиб ўтамиз, халқ депутатлари пойтахт кенгашининг 16 сентябрдаги сессиясида Тошкент ИИББ Йўл ҳаракати хавфсизлиги бошқармаси пойтахтнинг айрим кўчаларида энг юқори тезликни 60 км/соат (ҳозир 70 км/соат)гача чеклашни таклиф қилган, аммо депутатларнинг бир қисми бунга қарши чиққан, бошқалари эса бу чора самарадорлигига шубҳа билдирганди. Натижада кенгаш ушбу масалани кўриб чиқишни кейинги сессияга қолдирганди.

Сессияда иштирок этган Йўл ҳаракати хавфсизлиги бошқармаси бошлиғи ўринбосари Шерзод Носиров шу йилнинг саккиз ойида Тошкентда 645 та ЙТҲ содир бўлгани, бунинг натижасида қурбонлар сони ўтган йилнинг шу даврига нисбатан 720 нафардан 775 нафарга кўпайгани, барча бахтсиз ҳодисаларнинг қарийб ярми — 47,9 фоизи тезликни ошириш туфайли содир бўлганини таъкидлаб, ўлимга олиб келадиган авариялар сонини кескин камайтириш мақсадида Тошкентнинг айрим кўчаларида тезликни камайтиришни маъқуллашни таклиф қилганди.

Бироқ ушбу таклифга бир қатор депутатлар кескин қарши чиқишган. Жумладан, депутатлар Азамат Зиё, Муродхон Жўраев, Дилшод Шоумаровлар максимал тезлик 60 км/соатгача пасайтирилиши муаммога ечим бўла олмаслигини таъкидлашган.

^{Фото: Тошкент шаҳар ҳокимлиги ахборот хизмати}
Сессияда кўрилган масала ва қабул қилинган мужмал қарор ижтимоий тармоқларда катта резонанс келтириб чиқарганди. Айрим фойдаланувчиларгина депутатлар тўғри қарорга келишганини айтган, аммо бу мавзуда хорижий тажрибаларни аллақачон Ўзбекистонда ҳам жорий этиш кераклиги ҳақида айтиб келадиган журналистлар ва блогерлар депутатларнинг қарорини қоралаган.

Жумладан, Никита Макаренко “Ўзбекистон раҳбарияти, илтимос, келинглар, ушбу муҳим ислоҳотни шу шармандалар иштирокисиз амалга оширайлик!” деб айтганди.

^{Фото: Тошкент шаҳар ҳокимлиги ахборот хизмати}
Тошкент кўчаларида тезлик лимити пасайтириш кечиктирилиши қаттиқ танқидга учрагач, халқ депутатлари Тошкент шаҳар кенгаши мазкур таклиф рад этилмагани, халқ депутатлари Тошкент шаҳар Кенгашининг навбатдаги сессияси муҳокамасига қайта киритиш тўғрисида қарор қабул қилингани маълум қилганди.

Президент Шавкат Мирзиёев шу йил феврал ойида Самарқанд шаҳрига қилган ташрифида яқинда Тошкентда тезлик кўпи билан 60 км/соатгача пасайтирилиши режалаштирилаётганини айтганди. “Замин” янгиликларини “Telegram”да кузатиб боринг