23:03 / 15.12.2022

Ўзбекистонда арзон ижтимоий уй-жойлар қуриш бўйича Туркия тажрибасидан фойдаланилади

^{Фото: Инвестициялар ва ташқи савдо вазирлиги}
Уй-жой қурилиши соҳасида Ўзбекистон—Туркия ҳамкорлигининг истиқболлари кўриб чиқилди, деб хабар бермоқда Инвестициялар ва ташқи савдо вазирлиги матбуот хизмати.

Маълум қилинишича, 14 декабрь куни Жамшид Хўжаев Инвестициялар ва ташқи ишлар вазирлигида Туркия давлат уй-жой бошқармаси (ТОКИ) раҳбари Омер Булут билан учрашди.

Учрашувда Ўзбекистон томони Туркия аҳолиси учун арзон ижтимоий уй-жойлар қуриш бўйича ТОКИ фаолиятини юқори баҳолади ҳамда илғор турк технологиялари ва тажрибасидан фойдаланган ҳолда уй-жой қурилиши соҳасида ҳамкорликни йўлга қўйишга қизиқиш билдирди.

Ўз навбатида Омер Булут Ўзбекистонда амалга оширилаётган кенг кўламли ислоҳотлар, инвесторлар учун яратилган қулай шарт-шароитларни алоҳида таъкидлаб, қўшма истиқболли лойиҳаларни ҳаётга татбиқ этиш, техник ва маслаҳат ёрдами кўрсатиш, шу жумладан, кейинги 5 йил учун «Ижтимоий уйлар яратиш стратегияси»ни ишлаб чиқишга кўмаклашиш доирасида ҳамкорликни давом эттиришга тайёрлигини билдирди.

Мулоқот якунлари бўйича томонлар арзон ижтимоий уй-жойлар қуриш бўйича Туркия тажрибасидан фойдаланган ҳолда келгуси ҳамкорликнинг ташкилий жиҳатларини ишлаб чиқиш бўйича қўшма ишчи гуруҳ тузишга келишди.

Маълумот учун, Туркия давлат уй-жой бошқармаси 1984 йилда ташкил этилган. Унинг асосий мақсади кам ва ўрта даромадли фуқароларнинг уй-жойга бўлган эҳтиёжини таъминлашдан иборат. Сўнгги 20 йил давомида Туркияда бошқарма томонидан 1,1 миллион турар-жой биноси, 1395 мактаб, 20 университет, 997 спорт мажмуаси, 44 кутубхона қурилди.

Эслатиб ўтамиз, октябрь ойининг охирларида Туркия Атроф-муҳит, шаҳарсозлик ва иқлим ўзгаришлари вазири Мурат Курум билан учрашувда ижтимоий уй-жой қурилиши лойиҳасини амалга ошириш бўйича Туркия тажрибасини Ўзбекистонда қўллаш, шунингдек, аҳоли саломатлиги пунктлари ва Орол бўйи ҳудудида бандликни оширишга қаратилган қўшма лойиҳаларни амалга ошириш бўйича келишувга эришилганди.