Фото: ТАСС
Маҳаллий ишчи кучи борлигини ҳисобга олиб, чет эл фуқароларини бўш иш ўринларига жалб қилиш мақсадга мувофиқлигини ўрганиш тартиби бекор қилинади. Шунингдек, бизнесга нисбатан янги турдаги жавобгарлик киритишга бир йиллик мораторий эълон қилинади.
Ўзбекистон ҳукумати хорижий ишчиларни ёллаш тартибини осонлаштиришни режалаштирмоқда.
Давлат дастури лойиҳасига кўра, 2023 йил 1 мартдан бошлаб:
- чет эл фуқаролари учун Ўзбекистон Республикасида меҳнат фаолиятини амалга ошириш ҳуқуқига доир тасдиқномани олиш жараёнида маҳаллий ишчи кучи борлигини ҳисобга олиб, чет эл фуқароларини бўш иш ўринларига жалб қилиш мақсадга мувофиқлигини ўрганиш тартиби бекор қилинади;
- тасдиқнома амал қилиш муддати давомида чет эл фуқароси хориждан олиб келинган шахсий автотранспорт воситасини олиб чиқиб кетиш муддатини узрли сабабларга кўра ўтказиб юборганда қонунчилик ҳужжатларида белгиланган йиғимни тўлашдан озод этилади.
Таъкидланишича, бу – меҳнат бозорида “талаб юқори бўлган соҳаларга малакали мутахассисларнинг кириб келиши учун зарур шароитларни яратади”.
Дастур лойиҳасига асосан, шунингдек, 2023 йил 1 мартдан бошлаб тадбиркорлик субъектларига нисбатан янги турдаги жавобгарлик ва жазо чораларини жорий этишга бир йиллик мораторий ўрнатилиши кутилмоқда.
Бундан ташқари, савдо ёки хизмат кўрсатиш қоидаларини бузганлик учун жиноий жавобгарлик маъмурий юрисдикцияга ўтказиш орқали бекор қилиш таклиф этилмоқда.
Тадбиркорлик фаолиятини амалга оширишда биринчи марта ҳуқуқбузарлик содир этган кичик тадбиркорлик субъектларига молиявий санкция қўллашни тақиқлаш ҳам назарда тутилган.
Мазкур янгиликларни президент Шавкат Мирзиёев ўтган йили августда тадбиркорлар билан учрашувида анонслаган эди.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
