ЎзАнинг ёзишича, жорий йилнинг 10 феврал куни “Ҳудудгаз Бухоро” ГТФ ҳамда метрология хизмати мутахассислари ҳамкорлигида вилоятдаги айрим АГҚКШларда ўрганишлар олиб борилган. Ўрганишлар давомида “Солихов Олимжон Фазлиддинович” хусусий корхонасига қарашли 3 та АГҚКШда 11 млрд 847 млн 744 минг сўмлик табиий газ яширин равишда талон-торож қилингани маълум бўлган.
Аниқланишича, корхонанинг биринчи АГҚКШ филиалида 2022 йилнинг 1 ноябр кунидан 2023 йил 10 феврал кунига қадар бўлган даврда 3 млрд 493 млн 218 минг сўмлик, иккинчи АГҚКШ филиалида 2022 йилнинг 10 сентябр кунидан 2023 йил 10 феврал кунига қадар бўлган даврда 5 млрд 774 минг 443 сўмлик ҳамда учинчи АГҚКШ филиалида 2022 йилнинг 13 сентябр кунидан 2023 йил 10 феврал кунигача бўлган даврда 2 млрд 580 млн 83 минг сўмлик табиий газ яширин равишда талон-торож қилинган.
Тўпланган ҳужжатларга кўра, “Солихов Олимжон Фазлиддинович” хусусий корхонаси мансабдор шахсларининг ҳаракатларида жуда кўп миқдорда ўғрилик содир этишда ифодаланган жиноят аломатлари мавжудлиги аниқланган. Олиб борилган ўрганишлар натижасида мазкур ҳолат юзасидан Ғиждувон туманидаги “Солихов Олимжон Фазлиддинович” хусусий корхонаси мансабдор шахсларига нисбатан жиноят иши қўзғатилган.
“Замин” янгиликларини “Telegram”да кузатиб боринг
