Айни вақтда президент Шавкат Мирзиёев иштирокида Термиз шаҳрида халқ депутатлари Сурхондарё вилояти кенгаши сессияси бўлиб ўтаётгани тўғрисида хабар берилганди. Давлат раҳбари йиғилишда “Ўзбекистон ким томонда?” деган саволга жавоб берди.
“Замон жуда мураккаб, ҳозир катта-катта давлатлар Ўзбекистон, сен ким томондасан, деяпти. Нейтрал бўлиб юришинг бўлди энди, ё у томонга, ёки бу томонга ўтгин. Қаттиқ-қаттиқ айтиб, вакиллари ҳам келиб, ўзлари ҳам шунга даъват қиляпти. Бизга керак Ўрта Осиёда Ўзбекистон. Аҳолиси 36 миллион бўлди, 3-4 йилда 40 миллион бўлади, катта давлат бўлади, ким томонсан, деяпти. Қани, бундай оғир саволга қандай жавоб бериш керак?! Жавобим битта — бир томонман. Миллатим, халқим буюк Ўзбекистонимнинг манфаати учун ўлишга ҳам тайёрман, деб жавоб бераман”, — дейди давлат раҳбари.
Аввалроқ Шавкат Мирзиёев Сурхондарёга ташрифини Ҳаким ат-Термизий мақбарасини зиёрат қилишдан бошлагани тўғрисида хабар берилганди. Шунингдек, бугунги сессияда Сурхондарё вилоятига ҳоким тайинлаш бўйича ташкилий масала кўриб чиқилмоқда. Президент вилоят депутатлари ва фаоллари билан маслаҳатлашиб, вилоят ҳокими вазифасини бажариб келаётган Улуғбек Қосимов номзодини бу лавозимга таклиф қилди.
Шавкат Мирзиёев, Термиз шаҳри, ат-Термизий, Сессия «Замин» янгиликларини «Вконтакти»да кузатиб боринг
