Тошкент вилоятида ўзганинг банк картасидан пул ўғирлаб, онлайн қиморга тикиб юборган фуқарога жиноят иши қўзғатилди.
ИИВ Киберхавфсизлик марказининг хабар қилишича, Тошкент вилояти Қуйи Чирчиқ туманида яшовчи 63 ёшли аёл Ж.Б. мурожаат қилиб, банк картасидаги 2 миллион 55 минг сўм номаълум тарзда ечиб олинганини маълум қилган.
Тезкор-қидирув хизмати Киберхавфсизлик бўлинмалари томонидан ўтказилган тезкор-қидирув тадбирлари натижасида, ушбу жиноятни Тошкент вилояти, Қуйи Чирчиқ туманида яшовчи, муқаддам ўғрилик, талончилик жиноятлари учун судланган 36 ёшли эркак К.С. содир этгани аниқланган.
Маълум бўлишича, К.С. аёлга қўнғироқ қилиб, ўзини Mobiuz алоқа компанияси оператори сифатида таништирган ва унинг рақамига очилган пуллик хизматларни ўчириш учун “смс-хабарнома” орқали келган махфий кодни сўраб, билиб олган.
Натижада у аёлнинг банк карта бошқарув ҳуқуқини қўлга киритган ва у сезиб қолмаслиги учун маълум вақт давомида, яширин тарзда жами 2 миллион 55 минг сўм пулни бўлиб-бўлиб бошқа картага ўтказиб олган.
Шундан сўнг, К.С. жиноий йўл билан топган маблағларни янада кўпайтириш учун онлайн қиморга тикиб, ютқазиб қўйган.
Мазкур ҳолат юзасидан К.С.га нисбатан ЖКнинг 169-моддаси 3-қисми “а” банди билан жиноят иши қўзғатилиб, тергов ҳаракатлари олиб борилмоқда. Қонунга мувофиқ, К.С. томонидан содир этилган жиноий ҳаракатлар учун 5 йилдан 8 йилгача озодликдан маҳрум қилиш жазоси назарда тутилган.
“Замин” янгиликларини “Инстаграм”да кузатиб боринг
