Тошкент вилоятининг Қибрай туманида 18 ёшли йигит ариқда оқиб кетаётган қизчани қутқариб қолди. Ҳолат акс этган видео ижтимоий тармоқларда тарқалди.
Туман ҳокимлиги матбуот хизматининг маълум қилишича, воқеа 18 июнь куни соат 19:05 атрофида содир бўлган. Қибрай тумани “Хўжақўрғон” маҳалласидан оқиб ўтувчи Оқтепа каналига қўшилувчи Зоғариқда 2 ёшли қиз М.А. оқиб кетаётганида уни 18 ёшли йигит Й.Т. қутқариб қолган.
Отасининг сўзларига кўра, у уйида иш қилаётгани сабаб қизи сувга тушиб кетганини билмай қолган. “Қарасам, қизим йўқ. Ариқ бўйига югуриб бориб, кўрсам бетон ҳўл экан. Шунда ариққа тушиб кетганини тушундим. Етиб келгунимча, қўшни бола қутқариб қолибди. Раҳмат шу маҳалладагиларга. Шифохонага олиб бориб, икки соатлик шифокор кўригидан сўнг қизим ўйнаб-кулиб чиқиб келди”, — деган у.
Қизчани қутқарган йигитга туман ФВБ ходимлари томонидан ташаккурнома ва совға топширилган.
«Замин» янгиликларини «Вконтакти»да кузатиб боринг
