2023 йил ёз ойининг боши ҳатто Ўрта Осиё иқлими учун ҳам жуда иссиқ бўлди. Иссиқ ойнинг бошидан бошланди ва деярли иккинчи ўн кунлик охиригача давом этди.
“Ўзгидромет” хабарига кўра, бу даврда Ўзбекистон ҳудуди бўйича ўртача ҳаво ҳарорати ўртача кўп йиллик қийматлардан +3...+5 даражага юқори бўлди. Биринчи ва иккинчи ўн кунликларнинг энг иссиқ кунларида ҳаво +39...+42 даражагача, республиканинг энг чекка жанубида +43...+45 даражагача кўтарилди.
Қайд этилишича, июнь ойида бундай ҳарорат қийматлари кам учрайдиган ҳолат деб ҳисобланмайди. Метеорологик кузатувларнинг барча йиллари учун июнь ойининг мутлақ максимал ҳарорати +42...+44 даражани, чўл ҳудудларда ва жанубда +45...+48 даражани ташкил этади.
Аммо Ўзбекистонда меъёрга нисбатан юқори бўлган ҳарорат билан кузатилган ёз ойининг боши деярли камдан-кам ҳолларда кузатилади. Июнь ойининг учинчи ўн кунлигида Ўзбекистон ҳудудида Кавказдан салқин ҳаво кириб келиши кузатилди, бу ҳарорат фонини пасайтирди. Ҳудуд катта қисмида учинчи ўн кунликнинг ўртача ҳарорати меъёрдан +1...+2 даражага паст, баъзи жойларда меъёр атрофида бўлди. Бу даврда кундузги ҳаво ҳарорати +33...+38 даражагача, ўн кунликнинг ўрталарида эса +28...+30 даражагача пасайди. Ҳатто энг чекка жанубий ҳудудларда ҳам иссиқ +35...+37 даражагача пасайди. Умуман олганда, июнь меъёрдан +2...+3 даража юқори, шимолда эса меъёр атрофида бўлди.
Жорий йилнинг июнь ойида Тошкентда энг юқори ҳарорат +40,5 даражани ташкил этди, максимал ҳарорат икки маротаба +40 даражадан ошди. Тошкентда барча кузатув йиллари учун июнь ойидаги энг юқори ҳарорат (мутлақ максимал ҳарорат) +43 даражани ташкил этди. Бу йилгача энг иссиқ июнь ойлари қаторида биринчи ўринни 2021 йил июнь ойи эгаллаб келган, ушбу йилда Тошкентда максимал ҳарорат +42,6 даражага кўтарилган эди. Узоқ муддатли иссиқ об-ҳаво ҳисобига, Тошкентда 2023 йил июнь ойи кузатувлар тарихидаги энг иссиқ июнь ойи бўлди, у 2021 йил июнь ойидан ўтиб кетди. 2023 йил июнь ойидаги ўртача ҳарорат 2021 йил июнь ойига нисбатан +0,4 даражага юқори бўлди.
Ўзбекистон ҳудудининг катта қисмида 2023 йил июнь ойи энг иссиқ июнь ойлари рейтингида биринчи ўринни эгаллади. 2023 йил июнь ойининг яна бир хусусияти шундаки, Қорақалпоғистон Республикаси, Хоразм вилоятида ва Навоий вилоятининг шимолида нисбатан иссиқ бўлмади. Айниқса сўнгги йилларда бу ҳудудда ёз ойлар жуда иссиқ бўлган эди. Бироқ, бу йил республика шимоли-ғарбий ҳудудларига Россия ҳудудларидан нисбатан салқин ҳаво бир неча бор кириб келди ва ҳарорат фони мақбул атрофида сақланиб турди, фақат айрим кунларда, баъзи жойларда +40...+41 даражагача (1-3 кун) кўтарилди.
2023 йил июнь ойи республика ҳудудининг катта қисмида ғайриоддий ҳарорат тартибидан ташқари экстремал қуруқлик билан ажралиб турди. Ой давомида ёғингарчилик миқдори июнь ойи ойлик меъёридан 0-30 фоиздан кўп бўлмади.
“Замин” янгиликларини “Одноклассники”да кузатиб боринг
