Самарқандда такси ҳайдовчиси болани итлар ҳамласидан қутқариб қолди (видео)

Самарқанд шаҳар ҳокимлиги болага итлар ҳужум қилгани ва такси ҳайдовчиси уни қутқариб қолгани тасвирланган видеога муносабат билдирди.

Ижтимоий тармоқларда автомобиль йўли четида кетаётган болакайга итлар ҳужум қилгани тасвирланган видео тарқалди.

Ҳокимликнинг маълум қилинишича, ҳолат 8 июль куни Самарқанд шаҳридаги “Ёшлар” маҳалла фуқаролар йиғини ҳудудида жойлашган автотураргоҳ (гараж) олдида содир бўлиб, итлар ҳам “автогараж”га тегишли бўлган. Итлар ҳужум вақтида боланинг оёқ қисмига ташланган.

Ушбу итлар тезда Ободонлаштириш бошқармасининг Назоратсиз ҳайвонларни овлаш гуруҳи томонидан тутилиб, Самарқанд шаҳар ветеринария ва чорвачиликни қўллаб-қувватлаш бўлимига топширилган.

“Боланинг саломатлиги эса тўлиқ назоратга олинган”, — дейилади муносабатда.

Самарқанд вилояти ИИБ матбуот котиби ҳам ҳолатга ўз муносабатини билдириб, ҳолат қўшимча ўрганилаётгани, ўрганиш давомида итларнинг эгаси аниқланган тақдирда унга нисбатан қонуний тартибда чора кўрилишини маълум қилди.