Олий Мажлис Қонунчилик палатаси ва Сенатининг қўшма мажлисида Ўзбекистон сайланган президенти Шавкат Мирзиёев тантанали қасамёд қилиб, ўз лавозимига киришди.
Тантанали маросимни аввалида Марказий сайлов комиссияси раиси Зайниддин Низомхўжаев сўзга чиқиб, Шавкат Мирзиёевга президентлик гувоҳномасини топширди. Айни пайтда давлат раҳбари нутқ сўзламоқда.
Ўзбекистон Республикаси Президенти лавозимига сайланишимни мен инсон ҳуқуқ ва эркинликларини, халқ манфаатини таъминлашга қаратилган сиёсатимизнинг яна бир юксак эътирофи сифатида қабул қиламан”, – деди президент.
9 июль куни бўлиб ўтган президент сайлови натижаларига кўра Шавкат Мирзиёев 87,05 фоиз овоз олиб, ғолиб бўлганди. Робахон Маҳмудова 4,43 фоиз, Улуғбек Иноятов 4,02 фоиз, Абдушукур Ҳамзаев 3,74 фоиз овоз олганди.
Шавкат Мирзиёевнинг президентлик фаолияти
Шавкат Мирзиёев 2016 йил 4 декабрь куни бўлиб ўтган Президент сайлови якунлари бўйича сайловчиларнинг 88,61 фоиз овози билан Ўзбекистон президенти этиб сайланган. 2021 йил 24-октябрь куни бўлиб ўтган президент сайловида 80,1 фоиз овоз билан Ўзбекистон президенти этиб қайта сайланган. 6 ноябрь куни Олий Мажлис Сенати биносида инаугурация маросими бўлиб ўтган.
Мажлисни Марказий сайлов комиссияси раиси Зайниддин Низомхўжаев очиб бериб, Шавкат Мирзиёевга президент гувоҳномаси ва МСК шаҳодатномасини топширган. Шундан сўнг Шавкат Мирзиёев Ўзбекистон Конституцияси ва Қуръони Каримга қўл қўйган ҳолда қасамёд қилган ва йиғилганлар қаршисида нутқ сўзлаган.
“Замин” янгиликларини “Telegram”да кузатиб боринг
