Ўзбекистоннинг Япониядаги элчихонаси томонидан Камбағалликни қисқартириш ва бандлик вазирлиги ҳамда Япониянинг Gloсal Partner Cooperative, Japan Reigi Sahou ва Muroo компаниялари ўртасида учрашувлар ташкил этилди, деб хабар бермоқда “Дунё”.
Япон компаниялари томонидан меҳмонхона, ҳамширалик иши, турар ва нотурар биноларни таъмирлаш, қурилиш, автомобилларни таъмирлаш, қишлоқ хўжалиги ва қарияларни парваришлаш сингари соҳаларда ўзбекистонлик фуқароларни ишга жойлаштиришга тайёрлик маълум қилинди.
Музокаралар натижасида компаниялар билан меҳнат миграцияси соҳасида ҳамкорлик меморандумлари имзоланди, йилига жами 400 нафар мамлакат фуқароларини Японияга ишга жойлаштириш бўйича келишувларга эришилди.
Muroo компанияси билан ўзбекистонлик ишчиларни мазкур компаниянинг ўзида ҳамда ҳамкорлик йўлга қўйилган компанияларида ишга жойлаштириш юзасидан ҳам музокаралар ўтказилди. Компания вакиллари япон тилини ўргатишга ихтисослашган мамлакатимиз олий ўқув юртларида бакалавриатнинг охирги босқичларида ўқиётган талабаларни ўқишни битиргунга қадар тайёрлаб, келгусида “юқори малакали ишчи” тоифасида Японияда ишга қабул қилиш режалаштирилганини айтишди.
Бу борада япон компанияси Ташқи меҳнат миграцияси агентлиги ва олий таълим муассасаси ўртасида уч томонлама шартнома асосида ишларни ташкил этишга тайёр эканлигини маълум қилди. Шунда йилига 100 нафарга яқин Ўзбекистонлик фуқароларини Японияда иш билан таъминланади.
