426
Тошкент шаҳрида “Zo‘rTV” журналисти ва оператори калатакланди. Калтакланган оператор айни пайтда шифохонага ётқизилган. Калтакланган журналист Нурзодбек Воҳидовга кўра, воқеа бугун соат 13:30 атрофида содир бўлган.
Ижтимоий тармоқларда Тошкент шаҳрида бетонли тўсин темирйўл устига қулаб тушгани айтилган хабарлар тарқалгач, аслида нима бўлганини билиш учун воқеа жойига бордик. Воқеа жойига борганимизда журналистлар воқеани ўрганиб қайтишган экан. Бизга раҳбарият прокуратурага кетишган дейишгач, майли, ҳолатни сёмка қилайлик, дедик. Ва қулаган кўприкнинг олдига бормай, сёмка қилдик. Раҳбарият келавермагач, уларни сўрадик. Тушликда дейишди. Тушлик вақти тугагач ҳам келаверишмагач, яна сўрадик.
Раҳбарияти кечикаётгани учун биздан олдинги келган канал ходимларига қаерларни сёмка қилишга рухсат берилган, ўша жойларни олайлик, вақтимиз зиқ деб тушунтирдик. Хўп, деб биздан олдин борган каналлар сёмка қилган жойни кўрсатишди. Кириб, ҳолатни тасвирга олаётганимизда камерада кўринган одам сёмка қилма деб, сўкиниб кетди. Салом бериб, ўзимизни таништирдик. Аммо у киши ҳатто ўзини ҳам таништирмай сўкиниб, ишимизни йиғиштиришимизни талаб қилди. Бизни олиб чиқиш кераклигини айтди. Шундан сўнг ўзи камерага ташланди, — дейди воқеа ҳақида гапирган журналист.
Суҳбатдош журналистнинг айтишича, журналистларни калтаклаган зўравоннинг исми Нодир бўлиб, унинг лавозими ҳақида маълумот йўқ.
Операторимиз Сардорбек Йўлдошевнинг бурнини синдиришди. Айни пайтда операторимиз тез ёрдамда шифохонага олиб кетилган. Менда ҳам жароҳатлар бор. Шифокорлар тиббий кўрик зарур деди. Аммо телеканал камераси, микрофонини ишхонага етказишим керак эди. Шу сабаб мен барча иш қуролларни олиб ишхонага қайтдим, — дейди у.
Таъкидланишича, воқеа жойида телеканал камераси синган.
Бизни калтаклай бошлаган, операторимизнинг ишига халал берган кишига камерамиз қимматлигини тушунтиришга уриндик. Аммо парво қилмади. Ёнидаги кишилар бизга ёрдам бериб, зўравонни тўхтатиш ўрнига, бизни ушлаб олиб, унга ёрдам бераётгандек эди, — дейди журналист.
“Zo‘rTV” журналисти Нурзодбек Воҳидовнинг қўшимча қилишича, воқеадан сўнг ҳудуд профилактика инспектори уларга қўнғироқ қилиб, воқеа ҳақида сўраган.
Шунингдек, телеканалимиз раҳбарияти воқеа юзасидан ҳуқуқни муҳофаза қилувчи органларга хат чиқаришмоқчи. Каналимиз юристи биз билан суҳбатлашиб, ҳужжатлар тайёрламоқда, — дейди Нурзодбек.
17:32, 13-04-2025
