Кевин Спейси юрак хуружи гумони билан Тошкентдаги шифохонага ётқизилди

^{Фото: Global Look Press}

Америкалик актёр Кевин Спейси юрак хуружи гумони билан Ўзбекистон пойтахтида шифохонага ётқизилди. Бу ҳақда Британиянинг The Sun таблоиди ёзди.

«Кевин Спейси кинофестивалда қўли ишламай қолгани туфайли юрак хуружидан гумонланиб, шифохонага ётқизилди», деб ёзди газета.

Қайд қилинишича, Спейсининг «чап қўли бир неча сония давомида бутунлай қотиб қолган». Тошкентда актёрни МРТ текширувидан ўтказишган, бироқ, гумонлар тасдиғини топмаган.

Кейинчалик у саҳнада кўриниш бериб, томошабинларга саломатлиги «жойида» эканини айтган.

«Бу воқеа ҳаёт ҳар биримиз учун қанчалик нозик экани ҳақида ўйлаб қолишимга сабаб бўлди», деган у.

Актёр 29 сентябрдан 3 октябргача бўлиб ўтган XV Тошкент халқаро кинофестивалида иштирок этган.

Кевин Спейси 1959 йилда туғилган (ҳозир 64 ёшда), америкалик саҳна ва кино актёри, кинорежиссёр, сценарийнавис, продюсер. Кўплаб кинофилм ва сериалларда суратга тушган. «Оддий гумонланувчилар» ва «Америкача гўзаллик» филмлари учун «Оскар» (1996, 2000), BAFTA (2000), «Олтин глобус» (2015), «Тони» (1991) ва «Грэмми» (2006) каби кўплаб мукофотлар соҳиби.

Янгиликлар