Шавкат Мирзиёев “Турк дунёсининг олий ордени” билан тақдирланди. Бу ҳақда Президент матбуот хизмати хабар берди.
Туркий давлатлар ташкилоти давлатлар раҳбарлари кенгаши йиғилиши доирасида Ўзбекистон президентига туркий халқлар оиласининг бирлигини мустаҳкамлашга, туркий мамлакатларнинг манфаатлари ва қарашларини халқаро майдонда фаол илгари суришга қўшган улкан ҳиссаси учун ушбу мукофотни тантанали топшириш маросими бўлиб ўтди.
Тадбирда Қозоғистон, Озарбайжон, Қирғизистон, Туркия президентлати, Венгрия бош вазири Виктор Орбан, Туркман халқининг миллий етакчиси, Туркманистон Халқ Маслаҳати раиси Гурбангули Бердимуҳамедов иштирок этди.
Ташкилот давлатлари раҳбарлари номидан мукофотни Қозоғистон президенти топширди.
“Бу мукофотни мен биринчи навбатда чинакам биродарлик ришталари асосида янгидан юксалаётган яқин дўстлигимиз ва ҳамкорлигимиз рамзи, деб биламан”, — деди Шавкат Мирзиёев ҳамкасбларга миннатдорлик билдириб.
“Барчамизнинг орзу ва мақсадларимиз, интилиш ва ҳаракатларимиз уйғун ва ҳамоҳангдир. Азалдан дўст ва қардош бўлган туркий халқларимиз бундан кейин ҳам аҳил ва ҳамжиҳат бўлиб, ёруғ келажакни биргаликда бунёд этадилар”, — дея қўшимча қилди президент Шавкат Мирзиёев.
Ўзбекистон 2019 йилда Туркий давлатлар ташкилотига аъзо бўлиб кирганидан буён мамлакат томонидан туркий мамлакатлар ўртасида дўстлик, яхши қўшничилик ва кўп қиррали ҳамкорликни мустаҳкамлашга қаратилган 50 дан ортиқ таклиф ва ташаббуслар илгари сурилди.
Ўзбекистоннинг ташкилотга раислиги даврда 100 дан зиёд турли тадбирлар ўтказилди, амалий ҳамкорликнинг янги самарали механизмлари яратилди, нуфузли глобал ва минтақавий тузилмалар билан яқин шериклик алоқалари йўлга қўйилди.
“Замин” янгиликларини “Telegram”да кузатиб боринг
