Тошкентда ўтган Ўзбекистон—Италия саммити доирасида Ўзбекистон президенти рафиқаси Зироат Мирзиёева Италия президентининг қизи — ушбу мамлакат биринчи ледиси Лаура Маттарелла билан учрашув ўтказди, деб хабар беради ЎзА.
Қайд этилишича, самимий ва дўстона муҳитда ўтган суҳбат давомида икки мамлакат халқлари ўртасида дўстлик ва ўзаро англашувни янада мустаҳкамлаш, маданий ва гуманитар алоқаларни ривожлантириш тўғрисида фикр алмашилган.
Олий мартабали меҳмон Ўзбекистон ҳунармандчилиги намуналари билан танишган, унга ўзбек анъана ва урф-одатлари намойиш этилган.
Шавкат Мирзиёев таклифига биноан Италия президенти Сержо Маттарелла қизи Лаура Маттарелла ҳамроҳлигида 9 ноябрь куни расмий ташриф билан Ўзбекистонга келганди. 10 ноябрь куни ушбу давлат раҳбарини расмий кутиб олиш маросими бўлиб ўтди.
Давлат раҳбарларининг икки томонлама учрашувлари якунида кўп қиррали ҳамкорликни янада ривожлантириш бўйича қатор икки томонлама ҳужжатлар имзоланди. Шундан сўнг Шавкат Мирзиёев ва Сержо Маттарелла Кўксарой қароргоҳидаги Фахрий меҳмонлар хиёбонида давлат раҳбарлари биргаликда арча экди.
“Замин” янгиликларини “Telegram”да кузатиб боринг
