Вазирлар Маҳкамаси қарори билан профессионал таълим муассасаларига йил давомида ўқувчиларни дуал таълим шаклида ўқишга қабул қилиш тизими жорий этилиши муносабати билан бир қатор НҲҲларга ўзгартириш ва қўшимчалар киритилди.
Меҳнат бозори учун рақобатбардош ОТМ кадрларини тайёрлаш тизимини янада такомиллаштириш ҳамда ўқувчиларни дуал таълим шаклида қабул қилишнинг янги механизмларини жорий этиш мақсадида айрим НҲҲга қуйидагиларни назарда тутувчи ўзгартириш ва қўшимчалар киритилмоқда:
- профессионал таълим муассасаларида ўқувчиларни йил давомида ташкилотларнинг буюртмалари асосида дуал таълим шаклида ўқитиш;
- иш берувчиларнинг мавжуд эҳтиёжи асосида дуал таълим шакли бўйича ўқишга қабул қилишни соддалаштириш;
- ўқувчиларни дуал таълим шакли бўйича ўқишга қабул қилиш тизимини рақамлаштириш.
Олий таълим, фан ва инновациялар вазирлиги ташкилотлардан бириктирилган устозларнинг педагогик маҳоратини ихтиёрий равишда ошириш учун ҳар йили дуал таълим шакли бўйича бепул қисқа муддатли малака ошириш курсларини ташкил этади.
Дуал таълим шакли жорий этилган касб ва мутахассисликлар бўйича тегишли таълим дастурларини такомиллаштириш ҳамда Германия тажрибаси асосида методик материалларни ишлаб чиқиш режалаштирилмоқда.
2024-2025-ўқув йилига қадар меҳнат бозорининг малакали кадрларга бўлган жорий ва истиқболли эҳтиёжни аниқлашга мўлжалланган электрон платформа ишга туширилади.
Профессионал таълим муассасаларига ўқишга қабул қилиш тартиби тўғрисидаги низом ва Профессионал таълим тизимида дуал таълимни ташкил этиш тартиби тўғрисидаги низомга ўзгартиришлар киритилди.
“Замин” янгиликларини “Telegram”да кузатиб боринг