Иккиламчи бозорда уй-жой нархининг энг катта ўсиши уч ҳудудда қайд этилди

Иқтисодий тадқиқотлар ва ислоҳотлар маркази 2023 йилда кўчмас мулк бозорида қандай ўзгаришлар бўлгани юзасидан шарҳ эълон қилди.

Қайд этилишича, 2023 йилда кўчмас мулк бозори яхши натижаларни кўрсатди – битимлар ҳажми ошди, уй-жой ижараси нархи пасайди, иккиламчи уй-жойлар нархи ўсиш тенденциясини сақлаб қолди.

Ўзбекистонда кўчмас мулк савдоси 2023 йилда 5,7 фоизга ошди. Йил давомида 272,4 мингта уй-жой сотилди, бу ўтган йилги 257 мингта шартномаларнинг умумий кўрсаткичларидан ошди.

Битимлар ҳажмининг сезиларли ўсиши Қорақалпоғистон Республикасида қайд этилди, бу ўсиш бўйича барча ҳудудларни ортда қолдириб, Қашқадарё вилоятидан кейин иккинчи ўринда, мос равишда 16,8 фоиз ва 17,1 фоизни ташкил этди.

2023 йилда пойтахтнинг уй-жой ижараси бозори барқарорлашди. Умуман олганда, бир йил ичида Тошкент шаҳрида ўртача ижара нархи 10,2 фоизга пасайди ва ҳар квадрат метр учун 9,2 долларни ташкил этди.

Иккиламчи уй-жой бозорида нарх параметрлари сезиларли даражада ўзгарди. Йил давомида иккиламчи бозор 17,5 фоизга ўсди. Шу билан бирга, йилнинг биринчи ярмида ўртача ойлик ўсиш 1,8 фоизни, иккинчисида эса 1 фоизни ташкил этди.

Ўтган йилга нисбатан иккиламчи бозорда уй-жой нархларининг энг катта ўсиши Хоразм – 30,1 фоиз, Тошкент – 28,9 фоиз ва Бухоро вилоятларида қайд этилди - 24,5 фоиз. “Замин” янгиликларини “Telegram”да кузатиб боринг