Александр Лукашенко Ўзбекистонга келди

Ўзбекистон президенти таклифига биноан Александр Лукашенко 7 феврал куни расмий ташриф билан Ўзбекистонга келди. Бу ҳақда Бош вазир матбуот хизмати хабар берди.

Меҳмонни Тошкент халқаро аэропортида Ўзбекистон бош вазири Абдулла Арипов ва бошқа расмийлар кутиб олган. Шундан кейин Лукашенко Тошкентдаги Humo Arena муз саройига ташриф буюрди.

Спорт мажмуасида беларуслик меҳмонни Ўзбекистон президенти Шавкат Мирзиёев кутиб олган.

Танишув чоғида улар Тошкентнинг «Ҳумо» ва Остонанинг «Номад» ҳоккей жамоалари ўртасидаги учрашувни томоша қилишди. Ўйин якунида олий мартабали меҳмонларга уларнинг исмлари туширилган ҳоккей либослари топширилди.



Ташрифнинг асосий тадбирлари эртага, 8 феврал кунига режалаштирилган.

Ўзбекистон президенти матбуот хизмати берган хабарга кўра, ташриф дастурига мувофиқ олий даражадаги музокаралар ўтказилиши, уларда Ўзбекистон ва Беларус ўртасидаги кўп қиррали ҳамкорликни янада кенгайтиришнинг амалий жиҳатлари кўриб чиқилиши режалаштирилган.

Ўзаро товар айирбошлашни ошириш, қишлоқ хўжалиги, енгил ва озиқ-овқат саноати, фармацевтика, коммуникациялар ва бошқа тармоқларда кооперация алоқаларини ривожлантириш масалалари диққат марказида бўлади.

Профессионал таълим, соғлиқни сақлаш, маданият, спорт ва туризм соҳаларида шерикликни ривожлантириш дастурлари ҳам муҳокама қилинади.

Музокаралар якунида икки томонлама ҳужжатлар тўпламини қабул қилиш кўзда тутилган.

Шу кунларда, ташриф арафасида Тошкент шаҳрида икки мамлакат ҳудудлари ва тадбиркорлари иштирокида қатор ишбилармонлик тадбирлари – Ҳудудлараро форум ва Ишбилармонлар кенгаши йиғилиши бўлиб ўтмоқда. “Замин” янгиликларини “Telegram”да кузатиб боринг