Александр Лукашенко “Янги Ўзбекистон” боғидаги Мустақиллик монументи пойига гул қўйди

^{Фото: Бош вазир матбуот котиби}
Ўзбекистон президентининг таклифига биноан Беларусь президенти Александр Лукашенко 7 февраль куни расмий ташриф билан Ўзбекистонга келгани тўғрисида хабар берилганди. Бош вазир матбуот котибининг маълум қилишича, Александр Лукашенко бугун, 8 февраль куни “Янги Ўзбекистон” боғига ташриф буюрган.

Қайд этилишича, Александр Лукашенко бош вазири Абдулла Арипов ҳамроҳлигида “Янги Ўзбекистон” боғига ташриф буюриб, Мустақиллик монументи пойига гул қўйган.

Олий мартабали меҳмон мажмуа меъморий ечимлари ҳамда композициясининг мазмун-моҳияти ва хусусиятлари билан батафсил танишган.

^{Фото: Бош вазир матбуот котиби}
“Ватанимизнинг 3 минг йиллик тарихида юз берган энг муҳим воқеаларни ўзида ифода этган ушбу мажмуа Беларусь делегациясида катта таассурот қолдирди. Таъкидлаш жоизки, мамлакатимизга ташриф буюраётган меҳмонларнинг президентимиз Шавкат Мирзиёев ташаббуслари билан бунёд этилган мазкур муҳташам мажмуа билан танишуви анъанага айланган”, — дейилади хабарда.

^{Фото: Бош вазир матбуот котиби} “Замин” янгиликларини “Telegram”да кузатиб боринг