Фарғонада ўз хонадонида майнинг ферма ташкил этган фуқаролар давлатга 7 млрд сўмдан ортиқ зарар келтирди

^{Фото: Видеодан кадр}
Фарғона вилоятида 23 та ҳолатда электр энергиясидан ноқонуний фойдаланиш натижасида тизимга 7 миллиард 315 миллион сўм зарар етказилгани аниқланди, деб хабар беради Энергетика вазирлиги матбуот хизмати.

Маълум қилинишича, 1–8 феврал кунлари «Ўзэнергоинспекция» томонидан ДХХ, Бош прокуратура ва ИИБ ҳамда электр таъминоти корхоналари ходимлари билан ҳамкорликда Фарғона вилоятида ўтказилган назорат тадбирларида электр энергиясидан ноқонуний фойдаланилган 23 та ҳолат аниқланган. Дастлабки ҳисоб-китобларга кўра, тизимга 7,3 миллиард сўм зарар келтирилган.

Мисол учун, Фарғона шаҳри ва Фурқат туманида истиқомат қилувчи беш нафар фуқаро томонидан ўз яшаш хонадонларида криптоактив ва майнинг қурилмаларни электр тармоқларига ноқонуний улаб олишлари натижасида давлат манфаатларига жами 7 миллиард 14 миллион сўм миқдорида зарар етказилган.

Қоидабузар истеъмолчиларга нисбатан белгиланган тартибда чора кўриш учун тегишли ҳужжатлар расмийлаштирилиб, ҳуқуқни муҳофаза этувчи органларга тақдим қилинган. “Zamin”ни Telegram'да ўқинг!