Ўзбекистонда фуқароларга ўз салоҳиятини рўёбга чиқариш учун муносиб шароитлар яратилади

Ўзбекистонда ҳар бир инсонга ўз салоҳиятини рўёбга чиқариш учун муносиб шароитлар яратиш йўналиши доирасида 2024 йилда бир қатор ишлар амалга оширилади.

“Ўзбекистон–2030” стратегиясини 2024 йилда амалга оширишга қаратилган давлат дастури тўғрисидаги президент фармонига кўра, Президент ва ихтисослаштирилган мактабларнинг билимларни баҳолаш тизими қўшимча 1 000 та умумий ўрта таълим муассасаларида жорий қилиниб, фанлардаги амалий машғулотлар улуши 60 фоизгача оширилади.

Шунингдек, 7,5 минг нафар ёшлар замонавий касбларга ўқитилиши таъминланади, халқаро имтиҳон тизимларида чет тиллари бўйича юқори балл олган 6 минг нафар ёшларнинг имтиҳон харажатлари қоплаб берилади.

10 миллион нафар аҳолини югуриш, футбол, волейбол, стол тенниси, шахмат, миллий ва белбоғли кураш каби спорт турлари бўйича марафон ва мусобақаларни ташкил этиш орқали оммавий спортга жалб қилиш чоралари кўрилади.

2024 йилда Париж шаҳрида ўтказиладиган олимпия ва паралимпия ўйинларида муваффақиятли иштирок этиш учун камида 140 та лицензияни қўлга киритиш мақсадида 15 та олимпия ва паралимпия марказида ҳамда Тошкент шаҳри, Андижон ва Тошкент вилоятларидаги 14 та спорт базасида барча зарур шароитлар яратилади.

Бундан ташқари, 6,7 миллион нафар 40 ва ундан катта ёшдаги аҳоли орасида юрак-қон томир, қандли диабет, ўпканинг сурункали обструктив касалликлари хавфини аниқлаш бўйича профилактик кўриклар ташкил этилади. “Замин” янгиликларини “Telegram”да кузатиб боринг