Андижонда болалар аравачасига яширилган минглаб қўрғошин ўқлари тўхтатиб қолинди

^{Фото: Скриншот}
Андижон вилоятида божхона постидан жанговар ўқ-дорилар олиб ўтилишига уриниш аниқланди. Бу ҳақда Божхона қўмитаси ахборот хизмати маълум қилди.

Андижон вилояти божхона бошқармасининг “Дўстлик” чегара божхона постида қўшни давлатдан фарзандини болалар аравачасида етаклаб кириб келган аёл текширувдан ўтказилган.

"Ушбу аёл болалар аравачасининг таг қисмида ҳосил қилинган яширин бўлмага 4,5 мм калибрли 32 минг дона қўрғошин ўқларни хуфия тарзда жойлаштириб, олиб ўтишга уринган вақтида тўхтатиб қолинди.

Божхона ходимларининг оғзаки сўровида ва йўловчи божхона декларациясида маълум қилинмаган мазкур ўқларнинг умумий қиймати 9 миллион сўмдан ошмоқда", — дейилади қўмита ахборотида.

Мазкур постда аниқланган яна бир божхона қонунбузилиши ҳолатида эса жанговар ўқларнинг республика ҳудудига олиб кирилишининг олди олинди.

^{Фото: Скриншот}
Республикага кириб келган қўшни давлат фуқароси бошқарувида кириб келган автотранспорт воситаси белгиланган тартибда кўздан кечирилганда, салондаги ўриндиқлар остига 7 дона 5,45 мм калибрли жанговар ўқлар яширилгани фош бўлган.

Ҳозирда юқоридаги ҳолатлар юзасидан терговга қадар текширув ҳаракатлари олиб борилмоқда.

Маълумот учун, божхона ходимлари томонидан жорий йилнинг дастлабки чорагида аниқланган 42 та қонунбузарлик ҳолатларида 10 дона қурол, 858 дона ўқ, 437 дона гилза, 900 дона капсула, 8,2 килограмм дроб ва 2,4 килограммдан зиёд портловчи моддалар контрабандасига чек қўйилган.

Ўтган йилнинг шу даври билан таққослаганда, мазкур йўналишда аниқланган ҳолатлар сони 16 тага, ушлаб қолинган қуроллар 2 тага, ўқлар эса 657 тага кўпайган.

Амалдаги тартибларга мувофиқ, фуқаровий ва хизмат қуролини ҳамда унинг ўқ-дориларини Ўзбекистон ҳудудига олиб кириш Ўзбекистон Республикаси Ички ишлар вазирлигининг рухсатномаларига кўра амалга оширилади. «Замин» янгиликларини «Вконтакти»да кузатиб боринг