Ўзбекистонда италияликлар мода ва дизайн соҳасида дарс ўтади

^{Фото: “Дунё”}
Ўзбекистонда Италия вакиллари иштирокида мода ва дизайн соҳасида маҳорат дарслари ташкил этилади, деб хабар бермоқда “Дунё”.

Маълум қилинишича, Ўзбекистон элчиси Абат Файзуллаев Италиянинг CNA Ҳунармандлар, кичик ва ўрта корхоналар миллий конфедерацияси бошқарма бошлиғи, CNA Federmoda уюшмаси президенти Антонио Франческини билан учрашув ўтказди.

Мулоқотда Италия томони билан енгил саноат, мода ва дизайн соҳаларида фаолият юритувчи икки мамлакат тадбиркорлик субъектлари ўртасида ҳамкорликни йўлга қўйиш ва ушбу йўналишларда Италия тажрибасини жорий қилиш истиқболлари муҳокама қилинди.

Элчихона раҳбари бугунги кунда Ўзбекистонда енгил саноат, мебель, мода ва дизайн соҳалари ривожланиб бораётгани, сўнгги йилларда чет элга пахта хом ашёси экспорти тўлиқ тўхтатилганини таъкидлади. Шунингдек, ярим тайёр ва тайёр маҳсулотлар экспорти ошгани, тўқимачилик, чарм ва пойабзал товарларини ишлаб чиқариш каби соҳаларни янги сифатли даражага олиб чиқиш мақсадида хорижий тажрибага катта қизиқиш мавжудлиги қайд этилди.

Антонио Франческини, ўз навбатида, Ўзбекистон томони билан кичик ва ўрта бизнес соҳасида ҳамкорлик ўрнатиш ҳамда уни ривожлантиришга қизиқиш борлигини айтиб ўтди.

Мавжуд истиқболли ҳамкорлик йўналишларини инобатга олган ҳолда конфедерация вакили томонидан дастлабки қадам сифатида CNA’га аъзо компаниялар мутахассисларининг Ўзбекистонга сафарини ташкил этиш ва унинг доирасида соҳа мутахассислари учун маҳорат дарсларини уюштириш тўғрисида келишиб олинди.

Томонлар, шунингдек, ҳамкорликнинг кейинги босқичи сифатида мамлакатда Ўзбекистон-Италия мода ва дизайн марказини ташкил этиш юзасидан ҳам фикр алмашди. «Замин» янгиликларини «Вконтакти»да кузатиб боринг