Ўзбекистон Қозоғистонга режадан ортиқ миқдорда сув етказди

2024 йил октябрь ойидан бошлаб, Ўзбекистон Қозоғистонга умумий 12,6 миллиард куб метр миқдорида сув етказиб берди. Бу кўрсаткич аввал режалаштирилган миқдордан 1,7 миллиард куб метрга кўп бўлиб, Қозоғистоннинг жанубий вилоятларидаги деҳқонлар учун сув таъминотини яхшилашга хизмат қилмоқда.

Бу ҳақда Қозоғистон Республикаси сув хўжалиги вазири Нуржан Нуржигитов Самарқанд шаҳрида бўлиб ўтган халқаро форумда маълум қилди. Унинг таъкидлашича, ушбу сув ҳажми суғориш мавсуми давомида фермерларнинг эҳтиёжларини қондириш учун фойдаланилади.

"Трансчегаравий сувларни тақсимлаш ва бошқариш Марказий Осиёда сув хавфсизлигини таъминлашда муҳим аҳамият касб этади", – деди Нуржигитов.

Вазир мамлакатлар ўртасида сув танқислигига қарши биргаликда ҳаракат қилиш зарурлигини алоҳида таъкидлади. Аввалроқ Қозоғистон ва Ўзбекистон 2024 йил октябридан 2025 йил октябригача 16 миллиард куб метрдан ортиқ сув етказиш бўйича келишувга эришган эди.

Қозоғистон Сув хўжалиги вазирлигининг маълумотларига кўра:

Шимолий Орол денгизига қарийб 1,8 миллиард куб метр сув оқизилган, бу эса аввалги прогноздан 120 миллион куб метрга кўпроқдир.

Қозоғистонга 490 миллион куб метр сув Дўстлик давлатлараро канали орқали етказилган.

Маълумки, Қозоғистоннинг жанубий вилоятлари деярли тўлиқ Ўзбекистон ва Қирғизистондан келадиган сувга боғлиқ. Бундан ташқари, ушбу ҳудудларда сувнинг тахминан 60 фоизи қишлоқ хўжалиги эҳтиёжларига сарфланади.

Экспертлар трансчегаравий сув ресурсларини самарали ва адолатли тақсимлаш минтақавий барқарорлик ва озиқ-овқат хавфсизлиги учун ҳал қилувчи омиллардан бири эканини таъкидлашмоқда.

Ўзбекистон Қозоғистон Режа Сув Қишлоқ хўжалиги