Саида Мирзиёева: Болалар учун миллий контент яратувчи ёш ижодкорларга ҳар томонлама кўмак беришимиз керак

Президент ёрдамчиси Саида Мирзиёева миллий болалар контентини яратишда ёш авлод ижодкорларини ҳар жиҳатдан қўллаб-қувватлаш муҳимлигини алоҳида таъкидлади.

«Болалар учун сифатли миллий контент яратиш, биринчи навбатда, ёш ва иқтидорли ижодкорларни ҳар томонлама қўллаб-қувватлаш билан боғлиқ. Чунки айнан мана шу авлод халқимизнинг миллий руҳи, қадриятлари ва анъаналарини ҳис қилувчи ва келгусида миллий маданий маҳсулотларни ярата оладиган асосий кучга айланади», – дея фикрини билдирди Саида Мирзиёева.

Шу муносабат билан, яқинда «Ренессанс» болалар оромгоҳида ўтказилган ижодий мулоқотлар ва маҳорат дарслари катта аҳамиятга эга бўлди. Мазкур тадбир ёш истеъдод эгалари ва бу соҳа мутахассислари ўртасида ижодий кўприк вазифасини бажарди. Тажрибали профессионаллар ўз билим ва кўникмалари билан бўлишса, ёшлар ўзларининг оригинал ғоя ва лойиҳаларини намойиш этиш имкониятига эга бўлди.

«Бу каби самарали ва илҳомлантирувчи тадбирларни юртимизнинг турли ҳудудларида мунтазам равишда ташкил этиш зарур. Чунки мамлакатимизда иқтидорли ёшлар жуда кўп. Улар учун ўз йўлларини кўрсатадиган, йўналиш берадиган тажрибали устозларнинг кўмаги жуда муҳим», – деб таъкидлади Саида Мирзиёева.

Ўзбекистонда миллий маданий контентни янада ривожлантириш ва унинг ёш авлод орасида кенг тарқалиши мамлакатнинг маданий келажаги учун беқиёс аҳамиятга эгадир. Бу йўналишдаги фаолият ва лойиҳаларни ривожлантиришда давлат томонидан ҳар томонлама ёрдам кўрсатилиши муҳим эканлиги алоҳида қайд этилди. «Замин»ни Telegram’да ўқинг!