Сергелида катта ёнғин келиб чиқди: вазият вазир назорати остида бартараф этилди

14 май куни Тошкент шаҳрининг Сергели туманида катта ёнғин содир бўлди. Фавқулодда вазиятлар вазирлиги матбуот хизматининг маълум қилишича, соат 11:03 да Сергели тумани Нилуфар кўчасида жойлашган омборхонада ёнғин содир бўлаётгани ҳақида хабар тушган.

Фавқулодда вазиятларга қарши тезкор ҳаракат қилиш мақсадида соат 11:05 да воқеа жойига 12 та ёнғин-қутқарув гуруҳи етиб келиб, ёнғинни бартараф этиш ишларини бошлаган.

Ёнғин тахминан бир соат ичида назорат остига олинган. Аниқроғи, соат 12:15 га келиб ёнғин қуршаб олинган ва соат 13:31 га келиб тўлиқ ўчирилган.

Ҳодиса жойида ёнғинни бартараф этиш ишларига шахсан Фавқулодда вазиятлар вазири Ботир Қудратхўжаев ва унинг биринчи ўринбосари Санжар Зупаров раҳбарлик қилди.

Баъзи маълумотларга кўра, омборхонадаги ёнғин натижасида жабрланган ёки тан жароҳати олганлар тўғрисида хабар тушмаган. Ҳозирча ёнғиннинг келиб чиқиш сабаблари ва етказилган зарарнинг умумий миқдори бўйича тегишли хизматлар томонидан текширув ва тергов ишлари олиб борилмоқда.

Мазкур ҳодиса аҳоли орасида ёнғин хавфсизлиги қоидаларига янада қатъий амал қилиш зарурлигини яна бир бор эслатиб ўтмоқда. «Замин»ни Telegram’да ўқинг!