Яқинда Ўзбекистон Республикаси Президенти томонидан маҳаллаларда жиноятчиликнинг барвақт олдини олиш ва хавфсизликни таъминлаш тизимини янада такомиллаштириш мақсадида янги қарор қабул қилинди. Ушбу қарор «Ўзбекистон Республикаси Президентининг айрим қарорларига маҳаллаларда жиноятчиликнинг барвақт олдини олиш тизими натижадорлигини янада оширишга қаратилган ўзгартириш ва қўшимчалар киритиш тўғрисида» номли ҳужжат билан расман тасдиқланди.
Қарор қабул қилиниши ортидаги асосий мақсадлар қаторида, криминоген вазият нозик ва мураккаб маҳаллаларни юқори самарадорликка эга замонавий техник воситалар орқали тўлиқ қамраб олиш назарда тутилди. Хусусан, сунъий интеллект орқали ишловчи махсус дастурий таъминотга интеграция қилинган юқори технологияли кузатув камералари ўрнатилмоқда, бу эса маҳаллаларда хавфсизлик даражасини сезиларли ошириш имконини беради.
Шу билан бирга, 2025 йил якунига қадар жисмоний шахслар мол-мулкини техник қўриқлаш қамрови 30 фоизга, юридик шахслар мол-мулкини қўриқлаш қамрови эса 60 фоизга етказилиши режалаштирилмоқда. Бу чоралар аҳоли ва тадбиркорлик субъектлари мол-мулкини ҳимоя қилиш, ноқонуний ҳаракатлар ва хавфларни камайтиришга қаратилган.
Ички ишлар органларида юқори малакали кадрлар захирасини шакллантириш мақсадида, Ички ишлар вазирлиги Академиясида масофавий таълим шакли жорий этилиши ҳам белгиланди. Шунингдек, бакалавриат дастури бўйича қабул квоталари босқичма-босқич оширилиши назарда тутилмоқда, бу эса келажакда профессионал кадрлар тайёрлаш жараёнини янада ривожлантириш имконини беради.
Шу тариқа, Президент қарори маҳаллаларда хавфсизликни таъминлаш тизимини мустаҳкамлайди, жисмоний ва юридик шахсларнинг мол-мулкини ҳимоя қилади ҳамда ички ишлар органларида малакали кадрлар захирасини мустаҳкамлашга хизмат қилади. Маҳаллаларда хавфсиз муҳит яратиш, жиноятчиликнинг олдини олиш ва аҳоли ҳаётини барқарор ва хотиржам қилиш йўлида ушбу қадам муҳим аҳамиятга эга.
«Замин»ни Telegram’да ўқинг!
