Наманган вилоятининг Янгиқўрғон туманида вужудга келган жиноят бутун жамоатчиликни ларзага солди. Маълумотларга кўра, 7 ёшли қизалоқ ўз қариндоши томонидан зўрланган. Бу ҳақда Kun.uz манбаси орқали маълум қилинди.
Маълум бўлишича, 1987 йилда туғилган Б.С. 14 октябрь куни тоғаси яшайдиган уйда тўй маросимида бўлган. Тўй давомида у тоғасининг 2018 йилда туғилган невараси — вояга етмаган қизалоқни алдаб, уйдан четга олиб чиққан ва у ерда жинсий зўрлик ишлатган.
Жиноятдан кейин эркак воқеа жойидан қочиб, икки кун давомида яшириниб юрган. Аммо ҳуқуқ-тартибот органлари томонидан қидирув ишлари олиб борилиб, 16 октябрь куни у қўлга олинган. Янгиқўрғон туман суди уни қамоққа олиш ҳақида қарор чиқарган.
Маълум бўлишича, айбланувчи аввал ҳам шунга ўхшаш оғир жиноятлар учун судланган. 2020 йилда Наманган туман суди уни жинсий зўрлик ишлатиш моддаси билан 10 йил 2 ойга озодликдан маҳрум этган. Кейинчалик 2025 йилда суд унинг жазосини енгилроқ жазо — ахлоқ тузатиш ишларига алмаштирган.
Аммо бу уни тўхтатмаган. Ички ишлар маълумотларига кўра, у 2014 йилда ҳам зўрлик ва безорилик жиноятлари учун жазо олган.
Шу билан бирга, 2024 йил августидан кучга кирган қонунга мувофиқ, вояга етмаган шахсга нисбатан жинсий зўрлик қилган шахсларга жазони енгиллаштириш имконияти энди қўлланилмайди.
Тергов жараёнлари давом этмоқда. Мазкур ҳолат жамоатчилик орасида катта ғазаб уйғотди ва ҳуқуқни муҳофаза қилувчи органлар бундай жиноятларга нисбатан қатъий чоралар кўрилишига ваъда берди.
“Zamin”ни Telegram'да ўқинг!
