Жиззах вилояти, Зафаробод туманида ички ишлар органи ходимидан товламачилик йўли билан пул талаб қилган икки шахс қўлга олинди. Маълумотларга кўра, воқеа оддий турмуш ҳолати орқали бошланган, аммо тез орада жиноий ҳаракатга айланди.
Вилоят ИИБ маълум қилишича, ички ишлар ходими оила аъзоларини уйига олиб келиш мақсадида Telegram мессенжеридаги маҳалла гуруҳига такси кераклиги ҳақида хабар ёзган. Шу хабарни кўрган икки маҳалладош — 2007 йилда туғилган йигит ва 1999 йилда туғилган, пробация назоратида бўлган шахс — биргаликда товламачилик режасини тузган.
Маълум бўлишича, улар ходим билан гаплашиб, уни ишдан бўшатиш билан таҳдид қилган ҳамда мавжуд овозли ёзувларни ИИБ раҳбариятига етказмаслик эвазига дастлаб 15 миллион сўм, кейин эса 12 миллион сўм талаб қилган.
Аммо ходим вазият ҳақида дарҳол раҳбариятига маълум қилган. Натижада Ички ишлар вазирлиги Шахсий хавфсизлик бош бошқармаси ҳамда Жиззах вилояти ИИБ ходимлари томонидан тезкор тадбир ташкил этилди.
Тадбир чоғида товламачилар талаб қилинган пулни олаётган пайтда қўлга олинди. Улар Зафаробод туманида яшовчи маҳаллий фуқаролар экани маълум бўлди.
Текширув жараёнида улар аввал 6 ва 8 октябрь кунлари 102 хизматига қўнғироқ қилиб, гўё ички ишлар ходими уларни ҳақорат қилганини айтган, бироқ сўровларга жавоб бермагани аниқланган.
Ҳозирда 18 ва 26 ёшли фуқароларга нисбатан Зафаробод туман прокуратураси томонидан жиноят иши қўзғатилди. Тергов ишлари давом этмоқда.
Мутахассислар таъкидлашича, бу каби ҳолатлар фуқароларнинг интернетдаги масъулиятсиз хатти-ҳаракатларидан келиб чиқмоқда. Қонунни билиш ва ҳурмат қилиш ҳар бир инсон бурчи бўлиб қолмоқда.
“Zamin”ни Telegram'да ўқинг!
