Тошкент вилоятининг Оҳангарон туманида жиноят содир этган маҳкум ҳақидаги хабар жамоатчиликда кескин баҳсларга сабаб бўлди. Ижтимоий тармоқларда тарқалган маълумотларга кўра, 50-сон манзил колониясидан қочган 31 ёшли эркак 3-синфда ўқиётган қизни зўрлаган. Маҳаллий аҳоли уни далада ушлаб, ҳуқуқни муҳофаза қилувчи органларга топширган.
Ички ишлар бошқармаси маълумотига кўра, маҳкум 16 октябрь куни “П.Б.” корхонасига меҳнат фаолиятига жалб қилинган пайтда “номаълум томонга кетиб қолган”.
Текширувларда маълум бўлишича, у 2018 йилда Жиноят кодексининг 118-моддаси 4-қисми — 14 ёшга тўлмаган шахснинг номусига тегиш жинояти учун ҳукм қилинган. Суд ҳукмига биноан, у 2033 йилгача озодликдан маҳрум этилган ва 2024 йил август ойида жазонинг қолган қисмини ўташ учун манзил колонияга ўтказилган.
Ҳозирги вақтда жиноят содир этган шахс тезкор тартибда қўлга олинган. Унга нисбатан қамоқ эҳтиёт чораси қўлланилгани расман тасдиқланди.
“Zamin”ни Telegram'да ўқинг!
