Навоий вилоятида собиқ хотинини ва унинг ота-онасини юк машинаси билан атайлаб босиб ўлдирган эркакка умрбод қамоқ жазоси тайинланди. Ушбу ҳукм жиноят ишлари бўйича Томди тумани суди томонидан чиқарилган.
Маълум бўлишича, 41 ёшли С. Р. исмли шахс HOWO юк машинаси ҳайдовчиси бўлиб, чорва учун сув ташиш билан шуғулланган. У ушбу оғир жиноятни оилавий можаролар заминида содир этган.
Оилавий можаролар С. Р.нинг собиқ хотини Г.Э. билан 2021 йил апрел ойида расмий ажрашганидан кейин келиб чиққан. Улар Томди тумани, Шарқ қишлоғида Г. Э.га қарашли уйни баҳам кўрган.
2024 йил 20 декабрда Зарафшон туманлараро фуқаролик ишлари бўйича судининг қарорига кўра, С. Р. мажбуран ушбу уй-жойдан чиқарилиши керак эди. Қарорни ижро этиш учун Мажбурий ижро бюросининг (МИБ) шаҳар бўлими томонидан ижро иши қўзғатилган эди.
Фожиали ҳодиса жорий йилнинг 17 март куни юз берди. МИБ ходимлари мажбурий чиқариш жараёнини амалга ошириш учун воқеа жойига борганида, у ерда С. Р., унинг собиқ хотини ва уларнинг ота-онаси ҳам бўлган. Маълумотларга кўра, С.Р. HOWO юк машинасини бошқариб турганида, собиқ хотинини, сўнг унинг онаси ва отасини атайлаб босиб ўлдирган.
Воқеа жойида бўлган МИБ ходимларидан бири С. Р.нинг ҳаракатларини батафсил тасвирлаб берди.
Унга кўра, оқ рангдаги юк машинаси 15–20 метр масофада тўхтаб, ҳайдовчи йиғилган одамлар томон қараб, машинани собиқ хотинига қарата ҳаракатлантирган. Аввалига у собиқ хотинини деворга қистаб қўйган, сўнг рулни буриб, унинг онасини уриб, устида ўтган.
С. Р. ҳаракатларини давом эттириб, юк машинасини қайта айлантириб, ерда ётган аёл устида қайта ўтган. Шундан сўнг, у собиқ хотинининг ёрдамга шошилган отасини уриб юборган.
Жиноятни амалга оширгач, С. Р. машинадан тушиб, пичоқ билан Г. Э.га икки марта зарба берган.
Шундан кейин у МИБ ходимларига ҳам ҳужум қилишга уринган, аммо улар ўзларини ҳимоя қилиш учун чекинишга мажбур бўлишган. Охир-оқибат, С.Р. пичоқни ташлаб, юк машинасига ўтириб, воқеа жойидан қочиб кетган.
Натижада собиқ хотин ва унинг ота-онаси оғир жароҳатлар туфайли ҳалок бўлишган. Жиноят ишлари бўйича Навоий вилояти суди томонидан С.Р. Ўзбекистон Республикаси Жиноят кодексининг бир қатор оғир моддаларига, жумладан, "ўлдириш оғирлаштирувчи ҳолатлар асосида" (97-модданинг 2-қисми, "а, в, д, ж" бандлари) ва "ҳокимият вакилига қаршилик кўрсатиш" (219-модданинг 2-қисми) бўйича айбдор деб топилган.
Унга махсус тартибдаги колонияда умрбод озодликдан маҳрум қилиш жазоси тайинланди. Жиноят ишлари бўйича Навоий вилояти суди апелляция инстанцияси жорий йилнинг 28 октябр куни ушбу ҳукмни ўзгаришсиз қолдирди.
