Ўзбекистон Республикаси Миграция агентлиги Саудия Арабистонининг йирик тиббиёт муассасаларида фаолият юритишни истаган ҳамширалар учун янги имконият яратганини маълум қилди.
Маълумотга кўра, Саудиянинг нуфузли клиникалари — Saudi German Hospital (SGH), Dr. Soliman Fakeeh Hospital, Dr. Sulaiman Al Habib Medical Group (HMG) ҳамда Abeer Medical Group каби шифохоналарда бўш иш ўринлари мавжуд. Бу клиникалар нафақат Яқин Шарқ минтақасида, балки халқаро тиббиёт соҳасида ҳам юқори обрўга эга ҳисобланади.
Танловда иштирок этишни истаган номзодлардан қуйидаги талаблар қўйилган:
— ҳамширалик иши бўйича бакалавр ёки ўрта-махсус дипломга эга бўлиш;
— соҳада камида бир йиллик амалий тажрибага эга бўлиш;
— ёши 45 дан ошмаган бўлиши;
— инглиз тилини мулоқот даражасида билиш (араб тилини билиш устунлик ҳисобланади).
Миграция агентлиги маълум қилишича, номзодлар учун танловлар жорий йил ноябрь ойида Тошкент шаҳрида ва республика ҳудудларида онлайн ҳамда офлайн форматда ўтказилади. Аниқ жой ва сана ҳақида қўшимча маълумот алоҳида эълон қилинади.
Ташкилотчиларнинг таъкидлашича, Саудия Арабистонидаги иш берувчилар томонидан барча зарур шарт-шароитлар яратилади. Жумладан, ишчи виза расмийлаштирилади, турар жой билан таъминланади, авиабилет харажатлари қопланади. Шунингдек, номзодлар тиббий ва ижтимоий суғурта билан тўлиқ қамраб олинади.
Молиявий жиҳатдан ҳам ушбу таклиф жозибали — ҳамширалар учун ойлик маош 1000–1500 АҚШ доллари оралиғида белгиланган. Саудия клиникаларидаги иш шароити халқаро стандартларга мос бўлиб, хорижлик мутахассислар учун барча қулайликлар яратилган.
Миграция агентлиги фуқароларга мурожаат қилиб, мазкур имкониятдан фойдаланишни тавсия этди. “Бу нафақат муносиб иш жойи, балки тиббиёт соҳасида халқаро тажриба тўплаш учун ҳам муҳим имкониятдир”, — дейилади агентлик ахборотида.
Шу тариқа, Саудия Арабистонида ишлашни истаган соғлиқни сақлаш ходимлари учун кенг йўл очилди. Тиббиёт соҳасида фаолият олиб борувчи ўзбекистонлик ҳамширалар энди ўз малакасини халқаро миқёсда намоён этиш имкониятига эга бўлмоқдалар.
“Zamin”ни Telegram'да ўқинг!
