Наманган вилоятида 49 ёшли фуқаро Украинадаги қуролли можаро иштирокчиси сифатида суд ҳукмига тортилди. У Россия қуролли кучлари билан шартнома асосида жангларда қатнашганидан сўнг, ўз ихтиёри билан Ўзбекистонга қайтиб, ҳуқуқ-тартибот органларига мурожаат қилган.
Жиноят ишлари бўйича суд коллегияси ушбу шахсни Жиноят кодексининг 154-моддаси, яъни "Ёлланма жангчилик" бўйича айбдор деб топди ва унга уч йил бир ой муддатга озодликдан маҳрум қилиш жазоси тайинланди. Суд ҳужжатларига кўра, жиноятчи 2025 йилнинг апрел ойида Россия Федерациясига йўл олган ва у ерда Россия Мудофаа вазирлиги билан расмий шартнома тузган.
Шундан сўнг унга оддий аскар унвони берилган. У қисқа муддатли ҳарбий тайёргарликдан ўтиб, Луганск ҳудудида жойлаштирилган ва Украинадаги жанговор ҳаракатларга юборилган.
Май ойида жанглардан бирида мина портлаши натижасида яраланган. Даволанишни ҳарбий госпиталда ўтказганидан сўнг, Ўзбекистонга қайтишга қарор қилган.
Ватанига қайтганидан кейин у ҳуқуқ-тартибот идораларига ўз хоҳиши билан мурожаат қилиб, хизмат шартномасини, шахсий ҳарбий нишонини ҳамда госпиталдаги тиббий ҳужжатларни тақдим этган. Тергов давомида аниқланишича, у Россия қуролли кучларига қўшилиш ва жанговор ҳаракатларда қатнашиш учун бир марталик 1 миллион рубл миқдорида пул мукофоти олган.
Мазкур суд ҳукми яккама-якка ҳолат эмас. Бундан аввал Жиззах вилоятида ҳам шунга ўхшаш ҳолат қайд этилган эди.
Баҳмал туманидан 49 ёшли фуқаро икки маротаба Россия мудофаа идораси билан шартнома тузган ва унга ҳам уч йил бир ой муддатга озодликдан маҳрум қилиш жазоси белгиланган. Ўзбекистон фуқароларининг хориждаги қуролли можароларда иштирок этиши жиноят ҳисобланади.
