Тошкент шаҳридаги атмосфера сифати 20 ноябрь куни эрталаб яна жиддий аҳволни кўрсатди. Автоматлаштирилган мониторинг станциялари соат 09:00 да қайд этган маълумотлар пойтахт ҳавосидаги майда заррачалар миқдори катта тезликда ошганини кўрсатмоқда.
Мутахассислар қайд этишича, PM10 индикатори 299 мкг/м³ даражани кўрсатиб, аввал белгиланган меъёр — 300 мкг/м³дан ошмаган. Аммо вазиятнинг энг хавотирли қисми PM2,5 кўрсаткичида кузатилди — 202 мкг/м³. Бу рухсат этилган меъёрдан (60 мкг/м³) қарийб 3,5 баравар юқори.
Мазкур кўрсаткичлар ҳавода майда заррачалар сақланиб қолганини, улар атмосферанинг пастки қатламида тўпланганини англатади. Экологларнинг тушунтиришича, кейинги кунларда ҳароратнинг тез ўзгариши инверсия жараёнини кучайтириб, зарарли заррачаларнинг тарқалмасдан бир жойда йиғилиб қолишига сабаб бўлган. Бу эса аҳоли соғлиғи учун хавфли ҳисобланади.
Масъул идоралар аҳолига бир қатор эҳтиёт чораларини кўришни тавсия қилмоқда. Айниқса болалар, кексалар ва юрак-қон томир ҳамда нафас йўллари касалликларига эга фуқаролар кузатилган ҳолатга жиддий эътибор қаратишлари керак.
Тавсиялар қуйидагича:
— очиқ ҳавода юришни, узоқ вақт ўзини фаол ҳаракатга солишни чеклаш;
— ташқарига чиқишга тўғри келганда тиббий ниқоб тақиб юриш, айниқса хавф гуруҳига кирувчи фуқароларга;
— имкони борича ёпиқ биноларда бўлиш, хона вентиляциясини назорат қилиш ва эшик-ромларни маҳкам ёпиш.
Экологик вазият юзасидан қўшимча маълумотлар ва расмий тавсиялар мутасадди ташкилотлар томонидан доимий равишда янгиланиб борилади. Махсус хизматлар аҳолини ҳаво сифати кўрсаткичларини кузатиб боришга ва саломатликни асраш учун эҳтиёткорликни оширишга чақирмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
