Рақобат қўмитасига охирги ойларда умумий овқатланиш соҳасида хизматлардан норози бўлган истеъмолчилар мурожаатлари кескин ортди. Хусусан, айрим ресторан ва кафелерда таом нархидан ташқари 10–15 фоиз, баъзан эса ҳатто 20 фоизгача “хизмат ҳақи” қўшимча тўлов сифатида мажбурий равишда ундирилаётгани айтилмоқда. Шунингдек, баъзи муассасалар мижозлардан олдиндан депозит пули талаб қилаётгани ҳақида ҳам шикоятлар билдирилган.
Қўмита бундай ҳолатлар истеъмолчиларнинг асосий ҳуқуқларини бузиши мумкинлигини таъкидламоқда. Амалдаги қонунчилик — “Истеъмолчилар ҳуқуқларини ҳимоя қилиш тўғрисида”ги Қонуннинг 4-, 19- ва 21-моддаларига мувофиқ, ҳар бир фуқаро товар ва хизматлар ҳақида тўлақонли маълумот олиш, уларни эркин танлаш ва сифатли хизмат талаб қилиш ҳуқуқига эга. Ижрочи эса хизматни белгиланган муддатда, керакли ҳажм ва сифатда кўрсатиши шарт. Энг муҳими, сотувчи ёки хизмат кўрсатувчи харидорни мажбурий қўшимча харидларга ундаш ёки кўрсатилмаган хизматлар учун ҳақ олишга мутлақо ҳақли эмас.
Шикоятлар асосида Рақобат қўмитаси жамоат овқатланиш объекти эгаларига қатъий тарзда огоҳлантирув йўллади. Унда қайд этилишича, харидорни хабардор қилмасдан хизмат ҳақи ундириш — қонунга зид амалиёт. Шу боис директорлар ва тадбиркорлар таом нархлари, хизмат кўрсатиш тартиби, официант хизмати учун ҳақ миқдори каби барча шартлар ҳақида мижозни олдиндан аниқ ва очиқ маълумот билан таништириши шарт.
Шунингдек, қўмита айрим овқатланиш нуқталарида “ўз-ўзига хизмат қилиш” имкониятини жорий этиш, ортиқча қўшимча хизмат таклифларини мажбурий тарзда ўтказмаслик, ҳар бир тўловнинг асоси мижозга тушунтирилиши зарурлигини ҳам таъкидлади.
Қисқа қилиб айтганда, фуқаролардан тушаётган сигналлар давлат идораларини бу соҳада янада қаттиқроқ назорат ўрнатишга мажбур қилмоқда. Истеъмолчи ҳақи — устувор ва мижоз манфаатига зид бўлган ҳар бир амалиётга жавобгарлик белгиланиши мумкин.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
